13 sektorë, “pengojnë rrugën” për në BE – Strategjia/ Eliminim i barrierave tarifore dhe jo tarifore deri në 2030-ën

13 sektorë të ekonomisë përballen me barriera tarifore dhe jo tarifore duke e bërë shumë të vështirë depërtimin e bizneseve shqiptare në tregjet europiane. Ministria e Financave ka hedhur për konsultim publik strategjinë ndërsektoriale për mbrojtjen e konsumatorëve dhe mbikëqyrjen e tregut 2023-2030, e cila synon fuqizimin e një sistemi me funksionim të plotë të sigurisë ushqimore dhe të mbrojtjes së konsumatorit, monitorim dhe kontroll në përputhje me standardet e BE-së si dhe reduktimin e barrierave me vendet e BE-së.

Kështu, në dokument thuhet se është hartuar Planit i Veprimit për Përputhshmërinë me nenet 34 – 36 të Traktatit të Funksionimit të Bashkimit Europian (TFBE, i cili synon shqyrtimin e gjithë kuadrit ligjor shqiptar që rregullon tregtimin e produkteve, identifikimin, vlerësimin dhe shfuqizimin (apo mbajtjen e argumentuar) të masave me efekt të njëjtë me kufizimet sasiore për import/eksportin e tyre, të cilat janë të ndaluara sipas neneve të këtij traktati, apo e thënë shkurt barrierat jo-tarifore të pajustifikuara në tregti me vendet e BE-së.

Faza e parë e këtij Plani veprimi, me 18 sektorë/grup produkte të analizuara është finalizuar në dhjetor 2022, ndërkohë që faza e dytë ku do të përfshihen potencialisht të gjithë sektorët/produktet e tjera, do të fillojë në vitin 2023.

Pas përfundimit të procesit të identifikimit dhe analizës së masave/ barrierave, si dhe konsultimeve me institucionet përgjegjëse, rezulton se janë analizuar 60 akte ligjore dhe nënligjore që rregullojnë tregtimin e produkteve; Janë konsultuar 40 akte ligjore të BE-së relevante të cilat janë harmonizuar me këto akte apo rregullojnë produktet në fjalë; Janë identifikuar 28 barriera.

Qeveria synon që të synon vijojë procesin e identifikimit të pengesave ekzistuese të panevojshme për tregtinë e mallrave në Shqipëri dhe heqjen ose ndryshimit të tyre në përputhje me parimin e njohjes reciproke. Plani i Veprimit i përditësuar me sektorët/produktet e pashqyrtuara ende, do të mundësojë harmonizimin sistematik dhe gradual të legjislacionit dhe praktikave administrative shqiptare me kërkesat e legjislacionit të BE në përputhje me parimin e lëvizjes së lirë të mallrave.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.