13 vjeç për të përdorur inteligjencën artificiale – Raporti i UNESCO rekomandon vendosjen e kufirit të moshës në teknologji

Një raport i ri i UNESCO-s u kërkon qeverive të rregullojnë AI gjeneruese – GenAI në klasa, me një rekomandim për vendosjen e një kufiri moshe në teknologji.

GenAI, i cili prodhon përmbajtje të reja në forma të ndryshme duke filluar nga teksti në imazh, fitoi popullaritet në fund të vitit 2022 me ChatGPT, mjeti i gjuhës natyrore i OpenAI.

Në janar 2023, përdoruesit aktivë mujorë të ChatGPT arritën në 100 milionë njerëz. Gjashtë muaj më vonë, në korrik, vetëm një vend kishte nxjerrë rregullore mbi GenAI, sipas autorëve të raportit. Udhëzimet theksojnë se GenAI në arsim mund të ketë pasoja në ‘zhvillimin e kapaciteteve njerëzore si aftësitë e të menduarit kritik dhe kreativitet’.

UNESCO gjithashtu bën thirrje për kujdes ndaj një ndarjeje globale në rritje, e cila mund të theksohet më tej me teknologji të tilla si AI gjeneruese që është trajnuar për të dhëna të njëanshme për të gjeneruar përmbajtje. Sipas raportit në fjalë kapacitete të tilla me gamë të gjerë kanë pasoja potencialisht të mëdha për arsimin, pasi ato përsërisin të menduarit e rendit më të lartë që përbën themelin e të mësuarit njerëzor.

Raporti zbuloi gjtihashtu se shkollat ​​në mbarë botën janë kryesisht të papërgatitura për të përdorur AI gjeneruese në arsim për shkak të mungesës së politikave qeveritare.

Autorët sugjerojnë që qeveritë të ndjekin shtatë hapa për të përdorur AI gjeneruese në arsim me një qasje njerëzore në fokus, duke përfshirë zbatimin e rregulloreve GDPR dhe forcimin e rregullave të së drejtës së autorit.

Udhëzimet dhe rekomandimi i raportit për një “kufi moshe për përdorimin e GenAI” ishte i pari në botë i këtij lloji.

UNESCO thekson se ChatGPT kërkon që përdoruesit të jenë të paktën 13 vjeç, por  debatet në favor të rritjes së kufirit të moshës në 16 po zhvillohen në mbarë botën.

Autorët e raportit argumentojnë se shumë nga rregullat e mbrojtjes në internet për të miturit u miratuan shumë kohë përpara shpikjes së AI dhe u bëjnë thirrje politikëbërësve të rimendojnë kufizimet.

Raporti kërkon më shumë vëmendje në vitet e ardhshme, pasi thotë se arsimi mund të rikonceptohet plotësisht si pasojë e teknologjive aktuale dhe ato në zhvillim.

Miratimi për Aktin e AI të Bashkimit Europian ka të ngjarë të ndodhë në fund të këtij viti ose në fillim të 2024 – ës.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.