2.7 trilionë dollarë në vit për zero emetime – Objektivi vendoset deri në vitin 2050

Një investimi global prej 2.7 trilionë dollarë në vit nevojiten për të arritur emetimet neto zero deri në vitin 2050 dhe për të shmangur rritjen e temperaturave mbi 1.5 gradë Celsius këtë shekull, sipas një raporti nga “Wood Mackenzie”.

Shkencëtarët shprehen se bota duhet të kufizojë rritjen mesatare të temperaturës globale për të shmangur efektet katastrofike nga ndryshimet klimatike. Shumë qeveri janë zotuar të reduktojnë emetimet në zero neto deri në mesin e shekullit për të ndihmuar në arritjen e këtij objektivi. Megjithatë, shumica e vendeve nuk janë në rrugën e duhur për të përmbushur as objektivat e emetimeve deri në vitin 2030, e aq më pak ato të 2050 – ës, thuhet në raport.

Niveli zero i emetimeve i referohet uljes së tyre sa më afër zeros të jetë e mundur me çdo emetim të mbetur të ri-thithur nga atmosfera, për shembull nga oqeanet dhe pyjet.

Premtimet ekzistuese të qeverive për uljen e emetimeve do të dështojnë për sa i përket ndalimit të temperaturave globale nga rritja mbi 1.5C dhe ka të ngjarë të vendosin botën në rrugën e ngrohjes me 2.5C deri në vitin 2050, sipas Kombeve të Bashkuara.

“Wood Mackenzie” tha se për të dekarbonizuar sektorin e energjisë investimi prej 1.9 trilionë dollarë në vit është i domosdoshëm dhe kjo duhet të rritet me 150% – ose 2.7 trilionë dollarë në vit – për të kufizuar ngrohjen globale në 1.5 gradë Celsius. Tre të katërtat e këtij investimi nevojiten në sektorët e energjisë dhe infrastrukturës.

Burimet e rinovueshme si energjia e erës dhe diellit duhet të bëhen burimi kryesor i furnizimit me energji në botë për të mbështetur elektrifikimin e transportit dhe prodhimin e hidrogjenit të gjelbër, thuhet ndër të tjera në raport. Nafta dhe gazi kanë ende një rol për të luajtur si pjesë e një tranzicioni të menaxhuar.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.