2 miliardë dollarë për portin turistik në Durrës – Përfitimet për Shqipërinë, ende të panjohura, Rama: Do caktohen gjatë negocimit të kontratës 

Shteti shqiptar do të jetë aksioner, por përfitimet nga ndërtimi i portit turistik në Durrës janë të panjohura. Një ditë më parë, në një ceremoni të organizuar në ambientet e kryeministrisë, u firmos memorandum i mirëkuptimit mes kompanisë së përfaqësuar nga investitori arab, Muhammed El Alabbar dhe shoqërisë së krijuar për koordinimin dhe administrimin e proceseve të lidhura me projektit.

Ndërkohë që, sipas kryeministrit Edi Rama përfitimet mbeten për t’u negociuar, ndërsa do të bëhen publike kur marrëveshja të shkojë në parlament.

“Shteti shqiptar aty do të jetë aksioner, do të jetë ortak dhe shteti është ortak kur ata të cilët negociojnë mendojnë për shtetin dhe nuk mendojnë për xhepin e tyre siç kanë menduar tërë jetën e tyre ata të cilët akuzojnë se ne bëjmë të njëjtën gjë që ata kanë bërë, se nuk dinë të bëjnë jë tjetër e nuk dinë të shikojnë ndryshe përveç se ashtu, por kjo i mbetet negociatave që do të finalizohen e që do të publikohen i rezultat në momentin kur marrëveshja do të shkojë në Parlament për tu miratuar nga Parlamenti i Shqipërisë”.

Ndërkaq, Rama konfirmoi edhe njëherë se nënshkrimi i kontratës për zbatimin e këtij projekti do të bëhet përmes ligjit special, që anashkalon konkurrencën përmes procedurave të prokurimit publik.

Gjithsesi sot ne jemi në kushtet kur po e nënshkruajmë një protokoll i cili i hap rrugë ligjit, për të konkluduar negociatat për një kontratë që do të jetë një kontratë shembullore e kontrata do të jetë përgjigja më e mirë për të gjithë ata që kanë spekuluar e nuk anë lënë gjë pa thënë për këtë projekt që është një nga projektet që do të ndryshojë jo Durrësin por Shqipërinë përgjithmonë.

Vlera e investimit për ndërtimin e portit turistik në Durrës parashikohet të jetë 2 miliardë dollarë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.