6-mujori, bankat rrisin të ardhurat nga interesat – Nga 28.7 miliardë lekë në gjysmën e parë 2022, rezultojnë 39.5 miliardë në 2023

Rritja e normave të interesit përgjatë vitit të shkuar ka sjellë rritje të ndjeshme të të ardhurave të sistemit bankar. Sipas të dhenave zyrtare të Bankës së Shqipërisë, të ardhurat bruto nga interesi për gjashtë muajt e parë të vitit rezultojnë 37.6% më të larta se e njëjta periudhë e një viti më parë. Nga 28.7 miliardë lekë në gjysmën e parë të vitit 2022, të ardhurat nga interesat rezultojnë në 39.5 miliardë lekë në gjashtë muajt e parë të këtij viti.

Rritja e normës bazë prej muajit mars të vitit të kaluar po transmetohet në tregjet financiare. Pavarësisht luhatjeve afatshkurtra, normat e interesit të letrave me vlerë të qeverisë, të kredive dhe të depozitave, janë më të larta se një vit më parë.

Banka e Shqipërisë në analizën më të fundit mbi kreditimin thotë se  pret në vijim zgjerim të të mëtejshëm të kreditimit, në përputhje me ritmet e rritjes së ekonomisë dhe të mbështetur nga shëndeti i mirë i sektorit bankar.

Financimi i bankave për sektorin privat u rrit mesatarisht me 8.1% gjatë tremujorit të dytë, normë kjo 0.6 pikë përqindje më poshtë se rritja vjetore e tremujorit të parë. Ky ngadalësim është vërejtur si te bizneset ashtu edhe te individët. Zhvillimet sipas monedhave tregojnë zhvillime në kahe të kundërta të kreditimit në lekë dhe asaj në valutë. Kështu, norma e rritjes së portofolit të kredisë në monedhën vendase u përshpejtua në 7.1% në muajin qershor, ose 3 pikë përqindje më shumë nga niveli më i ulët që shënoi në muajin shkurt.

Përmirësimi është udhëhequr nga rikthimi i financimit për mbulimin e nevojave afatshkurtra si për biznese dhe për individë nga bankat. Ndërkohë, kreditimi në valutë ka ruajtur tendencën ngadalësuese të fillim vitit. Norma vjetore e këtij portofoli arriti në 10.3% ose 5 pikë përqindje më pak se fundi 2022.

Gjithashtu, rikthimi i kërkesës për financim në lekë pasqyron ngushtimin e shpejtë të diferencës midis normave të interesit të kredisë në lekë me atë në euro.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.