750 mijë prona të pashfrytëzuara në Greqi – Asnjëra prej tyre nuk del në treg për shitje

Oferta e ndërtesave të banimit në Greqi po zvogëlohet çdo vit, në të njëjtën kohë ndërtimi i atyre të rejave është ngadalësuar dhe shumë ndërtesa banimi nuk po përdoren. Sipas vlerësimeve të ekspertëve, në tregun grek mungojnë më shumë se 100 mijë prona banimi, raportojnë mediat vendase.  Përfaqësues të agjencive imobiliare deklarojnë se në qendër të Athinës oferta totale e pasurive të paluajtshme në vitin 2022 është ulur me 7727 krahasuar me vitin 2021.

Sipas të dhënave të qeverisë, 750 mijë prona nuk po shfrytëzohen dhe ka shumë arsye për këtë. Shumë prona janë të vjetra dhe kërkojnë rinovime të konsiderueshme në mënyrë që të jenë përsëri funksionale, dhe një arsye tjetër është se shumë prona kanë pronarë të shumtë, sidomos në zonat në qendër të Athinës. Një përqindje e konsiderueshme e pronave të mbyllura kanë dëme të konsiderueshme, të cilat pronarët nuk mund t’i rikthejnë.

Çmimet e qirave të apartamenteve janë rritur, ndaj kjo është një nga arsyet pse shumë pronarë vendosin të marrin me qira prona të paluajtshme në vend që t’i shesin. Ndërkohë çmimet e shitjes së shtëpive parashikohen të jenë në një trajektore të lehtë ngadalësuese në vitet e ardhshme. Sipas parashikimit të Bankës së Pireut në studimin e saj përkatës për ecurinë e ekonomisë, në vitin 2023 ritmi i rritjes pritet të jetë 7.4%, nga 11.1% në 2022. Rrjedhimisht, për tre vitet e ardhshme 2024, 2025 dhe 2026 parashikohen rritje prej 6.5%, 6% dhe 5.6%.

Nëse këto vlerësime konfirmohen, ato do të sinjalizojnë para së gjithash kalimin e vlerave në tregun e banesave në një epokë të re, pasi do të përfundojë një rikuperim i plotë, duke tejkaluar nivelin më të lartë të mëparshëm, që u regjistrua në vitin 2007.

Arsyeja kryesore për lëvizjen në rritje të çmimeve është padyshim mungesa e ekuilibrit midis ofertës dhe kërkesës, pasi dhjetëra mijëra shtëpi mbeten të bllokuara mes ankandeve dhe mbylljeve nga bankat dhe agjencitë e mbledhjes së borxheve.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.