8,4 milionë euro për Shqipërinë e Kosovën – Programi i bashkëpunimit ndërkufitar i BE, gati për ratifikim në Kuvend

Bashkimi Europian do të financojë një shumë prej 8,4 milionë euro në formë granti për programin e bashkëpunimit ndërkufitar ndërmjet Shqipërisë dhe Kosovës për periudhën 2021-2027. Ndërkohë, të dy qeveritë do të bashkëfinancojnë një shumë totale prej 1,334 milionë euro.

Marrëveshja për këtë program ka mbërritur në Kuvendin e Shqipërisë për ratifikim. Fushat prioritare të programit janë mbrojtja e mjedisit, politikat e zbutjes dhe përshtatjes ndaj ndryshimeve klimatike, parandalimi dhe menaxhimi i rreziqeve, si dhe turizmi dhe trashëgimia natyrore dhe kulturore.

Objektivi i përgjithshëm i programit është nxitja e marrëdhënieve të mira fqinjësore, inkurajimi i integrimit në Bashkimit Europian dhe kontributi në zhvillimin social, ekonomik dhe territorial të zonës ndërkufitare të programit përmes përmirësimit të mbrojtjes dhe ruajtjes së burimeve mjedisore dhe zhvillimit të turizmit të qëndrueshëm kulturor dhe natyror.

Zona e programit mbulon një popullsi prej rreth 936 mijë banorësh dhe një territori prej 8 335 km katror, me një vijë kufitare prej 114 km. Në zonat e lejueshme shqiptare për përfitim nga fondet e programit përfshihet: Qarku Kukës (bashkitë: Kukës, Has dhe Tropojë), Qarku Lezhë (bashkitë: Lezhë, Mirditë dhe Kurbin). Ndërsa, nga pala e Kosovës përfshihet: Rajoni Ekonomik Jugor (bashkitë: Prizren, Dragash, Rahovec, Suharekë, Malishevë dhe Mamusha) dhe Rajoni Ekonomik Perëndimor (bashkitë: Pejë, Deçan, Gjakovë, Istog, Klinë dhe Junik).

Ratifikimi i kësaj marrëveshjeje financiare do të mundësojë zbatimin e përbashkët të projekteve në të ardhmen midis Shqipërisë dhe Kosovës, duke iu mundësuar në këtë mënyrë aktorëve rajonalë dhe vendorë nga të dyja vendet të shkëmbejnë jo vetëm njohuritë dhe përvojat por edhe të prodhojnë rezultate të dukshme dhe një efekt të matshëm për sektorin socio-ekonomik-mjedisor dhe politikat publike.

Programi i bashkëpunimit ndërkufitar Shqipëri – Kosovë 2021-2027 do të zbatohet deri në vitin 2029 dhe pavarësisht viteve përkatëse të programit, zbatimi operacional (kontraktimi) i alokimeve vjetore bëhet deri në 3 vite pas vitit faktik, sipas modalitetit të Komisionit Europian.

Parashikohet që për periudhën 2024 – 2029 vendi ynë të përfitojë një shumë prej rreth 4 milionë euro nga nënshkrimi i kësaj marrëveshjeje. Raporti i financimit të çdo projekti të financuar nga kjo marrëveshje është 85% grant i BE-së dhe 15% bashkëfinancim kombëtar, ndaj parashikohet që qeveria shqiptare duhet të sigurojë një bashkëfinancim indikativ prej rreth 600 000 euro, të shtrirë në vite.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.