Ndryshimet klimatike, sfidë për sektorin bujqësor – UNIDO jep zgjidhje për adresimin e problematikave

Ndryshimet klimatike në Shqipëri po kthehen në poblematikë serioze për sektorin bujqësor, për shkak të pasojave në cilësinë e produkteve dhe konkurrueshërinë. Këto zhvillime sjellin sjellin nevojën për adresim duke bërë bashkë një sërë aktorësh.

Organizata e Kombeve të Bashkuara për Zhvillim Industrial (UNIDO), në partneritet me Ministrinë e Bujqësisë dhe Zhvillimit Rural dhe Fakultetin e Ekonomisë dhe Agrobiznesit në Universitetin Bujqësor të Tiranës, organizuan një Konferencë Ndërkombëtare mbi Konkurrueshmërinë dhe Ndryshimet Klimatike – implikimet dhe sfidat për sektorin agroushqimor.

Kjo konferencë shërbeu si një platformë vendimtare për të diskutuar kompleksitetin e konkurrencës në kontekstin e ndryshimeve klimatike dhe zhvillimit të qëndrueshëm, duke prekur faktorë të shumtë si qeverisja, infrastruktura cilësore, zinxhirët e qëndrueshëm të vlerës dhe nevojat që lidhen me sektorin privat.

Dorina Nati, Menaxhere e Programit Global, GQSP: “Klima po ndryshon dhe ne duhet të shohim për instrumente që sjellin ndryshim dhe ndërgjegjesim. Adresimi i ndryshimeve klimatike është thelbësor për të përmirësuar cilësinë dhe konkurrueshmërinë e produkteve bujqësore shqiptare. Sfidat globale kërkojnë masa kolektive dhe kemi nevojë për ndërgjegjësim. Programi për cilësi dhe standarde i financuar nga qeveria zviceriane adreson ndryshimet klimatike për sektorin bujqësor. Kemi ndërmarrë dy studime të cilat mund të adresojne këtë sfidë.”

Këto sfida mund të adresohen përmes praktikave innovative bujqësore që duhet të ndjekin agrobizneset.

Ruth Huber, Ambasadore e Zvicrës në Tiranë : “Ndryshimet klimatike janë problematike për sektorin bujqësor dhe ka ardhur koha ta trajtojmë këtë çështje përmes hapave inovative dhe praktikave të qëndrueshme. Agrobizneset duhet të përshtaten ndaj ndryshimeve klimatike duke zbatuar standardet.”

Kjo konferencë ndërkombëtare mblodhi së bashku mbi 100 pjesëmarrës nga një spektër i ndryshëm palësh të interesuara. Konferenca u organizua nga UNIDO si pjesë e Programit Global të Cilësisë dhe Standardeve (GQSP) në Shqipëri, një nismë e gjerë që mbështet 13 vende në mbarë botën, përfshirë Shqipërinë.

Financuar nga Zvicra përmes Sekretariatit Shtetëror për Çështjet Ekonomike (SECO), programi GQSP fokusohet në rëndësinë e rritjes së aftësive të prodhimit vendor dhe ngritjen e standardeve në dobi të njerëzve, prosperitetit të tyre dhe mbrojtjes së mjedisit.

Diamila Leka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.