PD harton programin ekonomik – Taksë e sheshtë 10% mbi kapitalin, taksë e shitjes së pronës 2%

Departamentet e Ekonomisë, Financave Publike dhe Sipërmarrjes pranë Partisë Demokratike të drejtuar nga Sali Berisha, janë në përmbyllje të hartimit të programit qeverisës 2025-2029. Fokus kryesor është rritja ekonomike gjithëpërfshirëse e vendit.

Sipas ekspertëve të departamenteve rritja ekonomike do të mbështetet nga një sistem i thjeshtë fiskal me norma të ulëta, gërshetuar me burokraci të thjeshtuara, të kuptueshme e të pranuara nga të gjithë aktorët e tregut, si dhe një ekonomi e çliruar nga praktikat korruptive dhe klienteliste.

PD propozon krijimin e një Banke Zhvillimore me kapital shtetëror dhe kontribut të skemave të garancisë së donatorëve ndërkombëtarë, e cila do të financojë me kosto minimaliste të gjitha projektet që konsiderohen prioritare për zhvillimin si start-up e të rinjve, projekte zhvillimore, projekte të emigrantëve shqiptarë që do të kthehen në atdhe.

Gjithashtu, do të kryhet një reformë e thellë e sistemit fiskal aktual duke e thjeshtëzuar për të lehtësuar konsumatorët dhe bizneset, nëpërmjet uljes së numrit të shkallëve të ndryshme tatimore, implementimin e një takse të sheshtë 10% mbi kapitalin, implementimin e tatimit 10% mbi të ardhurat nga puna duke përjashtuar 50 mijë lekët e para, si dhe do të hiqet taksimi progresiv.

Ndërkohë, tatimi edhe mbi të ardhurat jo nga paga do të jetë 10% dhe taksimi mbi profesionet e lira dhe biznesin e vogël do të jetë zero.

Sipas ekspertëve të PD, tavani vjetor për tatim-fitimin zero për biznesin e vogël do të jetë në 18 milionë lekë, ndërsa kufiri i përjashtimit nga TVSH do të jetë 14 milionë lekë xhiro vjetore. Do te ulet nga 15% në 2% taksa e shitjes së pronës, si dhe do të hiqet “Taksa Rama” mbi karburantet, duke bërë që çdo litër karburant të kushtojë 24 lek më lirë.

Ndërkohë, të shtunën paradite në Parkun Olimpik të Tiranës, Partia Demokratike me kryetar Lulzim Bashën do të publikojë planin për zhvillimin ekonomik dhe punësimin.

Diamila Leka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.