Rritet “frikshëm” kërkesa për karburant dhe alkool – Doganat zbehin efektet e kursit të këmbimit, rekord të ardhurash

Pavarësisht efektit të lartë të humbjes që vijon të shkaktojë rënia e kursit të këmbimit, e cila për gjysmën e parë të vitit përllogaritet në 10,8 miliardë lekë, doganat kanë arritur të kapërcejnë këtë problematikë duke rritur ndjeshëm të ardhurat.

Kërkesa e lartë për mallra importi, kryesisht produktet e akcizës ka bërë që të ardhurat doganore, që gjenerohen nga TVSH-ja në import, akciza, taksa doganore dhe renta minerare gjatë 6-mujorit të parë të vitit 2024 të realizohen në vlerën 110 miliardë lekëve, ose rreth 7 miliardë lekë apo 70 milionë euro më shumë se e njëjta periudhë e vitit të kaluar, si dhe 0,2% më shumë se plani i të ardhurave doganore për 6-mujorin e vitit 2024.

Të dhënat paraprake të Drejtorisë së Përgjithshme të Doganave tregojnë se tejkalimi i planit në gjysmën e parë të vitit është arritur ndikuar edhe nga të ardhurat nga akciza të cilat kanë arritur në nivelet më të mira historike.

Rritja e numrit të turistëve në vendin tonë por edhe nisja e sezonit veror, ka sjellë rritje të kërkesës dhe të konsumit, ku konkretisht në 6 mujor janë importuar 13,800 ton karburant më shumë se e njëjta periudhe e një viti më pare  më parë, 95 ton cigare më shumë, si dhe regjistrohet rritje të importit me 101 ton kafe  dhe  2900 ton birrë gjatë kësaj periudhe.

Pritshmëria është që kjo kërkesë të rritet edhe më shumë duke qenë se muajt korrik-shtator kulmojnë sezonin veror,  si dhe frekuentimi dhe konsumi në zonat bregdetare dhe malore nga pushues vendas dhe të huaj është më i lartë.

Dy muajt e verës korrespondojnë edhe me pushimet vjetore që marrin punonjësit e administratës dhe të sektorit privat, çka sjell dhe ndikim të lartë në konsum.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.