Hartë strategjike për ndotjen akustike – Bashkia Tiranë, rreth 5 milionë lekë për pakësimin e nivelit të zhurmave

Ledina Elezi/SCAN

Bashkia Tiranë do të krijojë një hartë startegjike për zhurmat, e cila do të identifikojë zonat kryesore të qytetit që prodhojnë ndotje akustike. Sapo është hapur tenderi që synon të pakësojë ndotjen akustike në qytetin e Tiranës, përmes marrjes së masave të reja për reduktimin e zhurmës.

Rreth 5 milionë lekë do të shpenzohen nga Bashkia për krijimin e kësaj harte, e cila do të ndihmojë në përcaktimin e mënyrave të reja të shmangies së ndotjes akustike dhe do të minimizojë efektet e padëshiruara në shëndetin publik, shkaktuar nga ekspozimi karshi zhurmave.

Bashkia e Tiranës do të kryejë monitorime të vazhdueshme akustike, analizë të të dhënave mbi nivelet e zhurmës dhe më pas do të kryejë hartëzimin e këtyre të dhënave në formën e “heat-map”.

Monitorimi zhurmës do të kryhet në të gjithë territorin e Bashkisë Tiranë duke përfshirë intensitet më të lartë të pikave të monitoruara në zonat me densitet të lartë banimi dhe aktivitetesh, si dhe intensitet më të ulët në zonat periferike, rurale dhe zonat natyrore.

Ky investim parashikon krijimin e një sistemi ku operatorët dhe aktivitetet që gjenerojnë zhurmë, të jenë në përputhshmëri me standardet kombëtare të emetimit të zhurmës dhe sipas kushtëzimeve të vendosura në zonat përkatëse.

Harta do të shërbejë për shpalljen e zonave të qeta në mjedis të banuar ose në mjedis të hapur, si dhe vendosjen e kufizimeve per zhurmën në përputhje me nivelet e lejuara të zhurmave në mjedis sipas udhëzimit të Ministrit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.