Britania shkurton miliarda paund në shpenzime – Objektivi, rregullimi i financave të paqëndrueshme

Dorina Kurtaj / SCAN

 

Qeveria e re e Mbretërisë së Bashkuar shkurton miliarda paund shpenzime për të rregulluar financat ‘të paqëndrueshme’.

Ministrja e re e financave të Britanisë, Rachel Reeves, i tha parlamentit se paraardhësi i saj konservator i kishte lënë shpenzimet publike në rrugën e duhur për të kapërcyer buxhetin me 21.9 miliardë paund këtë vit dhe njoftoi një shkurtim të menjëhershëm prej 5.5 miliardë paund.

Reeves bëri shkurtime të tjera prej 8.1 miliardë paund për vitin e ardhshëm financiar dhe premtoi më shumë masa me një buxhet të plotë më 30 tetor, kur qeverisë së re laburiste do t’i duhej të merrte “vendime të vështira”, duke përfshirë taksat.

Një pjesë e kostos vjen nga vendimi i Reeves për t’u dhënë punonjësve të sektorit publik rritje të pagave që kushtojnë në total 9.1 miliardë paund, pas rekomandimeve nga organet e pavarura të përcaktimit të pagave, të cilat ajo tha se konservatorët i kishin injoruar për një kohë të gjatë.

Reeves tha se gjendja e financave publike nuk ishte e qëndrueshme dhe përbën një rrezik për stabilitetin ekonomik nëse lihej i pakontrolluar.

Të zgjedhur për të drejtuar ekonominë e gjashtë më të madhe në botë me një fitore dërrmuese më 4 korrik, laburistët kanë kaluar pjesën më të madhe të tre javëve të para në pushtet duke u thënë votuesve se gjërat janë më keq se sa pritej në pothuajse çdo fushë të politikës publike.

Reeves trashëgoi një ekonomi me rritje të ngadaltë, borxh neto të sektorit publik në nivelin më të lartë që nga fillimi i viteve 1960 dhe një barrë tatimore që është në rrugën e duhur për të arritur një nivel të lartë gati 80-vjeçar.

Reeves akuzoi ish-qeverinë konservatore për mbulimin e gjendjes së vërtetë të shpenzimeve qeveritare dhe tha se asaj i duhej të merrte vendime të vështira për të parandaluar rritjen e deficitit buxhetor me 25% këtë vit.

Ajo bëri shkurtime në një sërë projektesh si ndërtimi i rrugëve dhe restaurimi i hekurudhave dhe tha se do të rishikonte një skemë për të rindërtuar spitalet; si dhe do të vendoste një objektiv ambicioz për departamentet qeveritare për të shtrydhur më shumë se 3 miliardë paund nga buxhetet e tyre.

Ajo shtoi gjithashtu se do të kursente rreth 1.5 miliardë paund në vit duke i ndaluar pensionistët me të ardhura më të larta të marrin një pagesë vjetore për kostot e ngrohjes.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.