Gjermania duhet të gjejë 9 miliardë euro – Buxheti i vitit 2025 shkakton debate të ashpra
Dorina kurtaj /SCAN
Qeveria e koalicionit në Gjermani është deri në 9 miliardë euro më pak nga buxheti i vitit të ardhshëm, ndërsa pret rezultatin e një rishikimi të disa masave të propozuara.
“Është e vërtetë që ne kemi ende një sfidë prej 8 deri në 9 miliardë euro – kancelaria ka publikuar gjithashtu propozime se si mund të arrihet kjo,” u shpreh ministri i financave Christian Lindner.
Në fillim të këtij muaji, koalicioni qeverisës i Gjermanisë miratoi projektbuxhetin për vitin 2025, por disa nga planet e tij janë vënë në pikëpyetje. Propozimi për t’u dhënë kompanive shtetërore Deutsche Bahn dhe Autobahn para’ në formën e kredive, të cilat nuk do të binin nën të ashtuquajturën frenim të borxhit, u kundërshtua nga ekspertët.
Këta të fundit theksojnë se duhet të vlerësohet me shumë kujdes nëse zëvendësimi i një granti qeveritar me një kredi me interes është i qëndrueshëm në afat të gjatë.
Nëse rezultati i testit është negativ, koalicioni qeverisës do të duhet të diskutojë alternativat deri në fund të nëntorit. Por shpallja e gjendjes së jashtëzakonshme për shkak të luftës në Ukrainë dhe anashkalimi i frenimit të borxhit në këtë mënyrë është i pamundur.
Ndërkohë është bërë e qartë se ministria e mbrojtjes nuk do të marrë asnjë para shtesë përtej fondit special prej 100 miliardë eurosh të caktuar për modernizimin e forcave të armatosura të Gjermanisë.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.