Bien detyrimet e shtetit për vendime gjyqësore – Stoku total arrin në 90 milionë euro, pushteti vendor mban peshën kryesore
Elisabeta Dosku/ SCAN
Stoku i detyrimeve të prapambetura që qeveria qendrore dhe ajo vendore kanë ndaj bizneseve dhe qytetarëve është rritur me afro 1.16 miliardë lekë përgjatë 3-mujorit të parë të vitit.
Të dhënat zyrtare të Ministrisë së Financave, tregojnë se nga 7.85 miliardë lekë që ishte ky stok në fund të vitit 2023, në muajin Mars duket të ketë arritur në vlerën e 9 miliardë lekëve apo rreth 90 milionë eurove.
Në totalin e kësaj shume, qeveria qendrore zë 3.5 miliardë lekë, ndërsa peshën më të madhe e zënë detyrimet e pushtetit vendor, me afro 5.5 miliardë lekë në fund të muajit Mars. Po ashtu, edhe rritjen më të lartë në raport me fundvitin 2023 e ka pasur pushteti vendor.
Sa i takon kategorisë së detyrimeve të prapambeturave, peshën më të madhe e zënë ato për investime publike, duke qenë se përgjatë këtij viti ka pasur një numër të lartë kantieresh të hapura, për të ofruar shërbime më të mira për qytetarët.
Konkretisht, detyrimet për investime, arrijnë vlerën e rreth 4.3 miliardë lekëve, ku stoku më i lartë sërish regjistrohet në pushtetin vendor.
Nga ana tjetër, stoku i detyrimeve për vendime gjyqësore për largime të padrejta nga puna apo ankimime të bizneseve ka pësuar një rënie të konsiderueshme. Qeveria qendrore dhe ajo vendore, regjistrojnë një vlerë prej rreth 1.3 miliardë lekësh, nga 1.6 miliardë lekë që regjistrohej në fund të viti të kaluar.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.