Taksa e pronës për bizneset në Tiranë, me 3 këste – Afati i fundit i pagës është më 30 shtator, shkak çmimet e referencës

Elisabeta Dosku/ SCAN

 

Çdo individ që ka një pronë që përdoret për aktivitet tregtar në Tiranë, këtë vit e ka të ndarë detyrimin në tre këste.

Pas dy kësteve të para të paguara në fund të muajit prill dhe në fund të muajit qershor, individët do të duhet të paguajnë edhe këstin e tretë deri më datë 30 shtator 2024.

Drejtoria e Përgjithshme e Taksave dhe Tarifave Vendore bën me dije se deri në këtë afat nuk do të aplikohen penalitete dhe kamatëvonesa, por nëse nuk paguajnë në kohë, më pas lindin detyrime të tjera.

Drejtoria e Përgjithshme e Taksave dhe Tarifave Vendore sqaron se metoda e pagesës me tre  këste do të aplikohet vetëm për këtë vit, për arsye se çmimet e reja të referencës në kryeqytet ndryshuan në Gusht të vitit 2023, pasi ishin mbyllur periudhat deklarative.

Automatikisht, këtë vit, individët do të paguajnë një vlerë në rritje takse për aktivitetet tregtare për shkak të rritjes së çmimeve të referencës në Tiranë dhe automatikisht të vlerës së tregut për këto njësi.  Bizneset mund të gjenerojnë detyrimin e tyre online përmes të dhënave që kanë për të aksesuar sistemin.

Bashkia Tiranës ka perfomancën më të mirë ndër 61 bashkitë në vend për mbledhjen e taksës së pronës.

Në vitin 2023, Bashkia e Tiranës ka mbledhur 24 milionë euro nga taksa e ndërtesës, ku përfshihen dhe njësitë e biznesit, duke shënuar rritje nga viti paraardhës.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.