Shqiptarët shpenzuan 14.2 mld lekë për sigurimet – 7-mujori shënon rritje me 7.58%, tregu vijon të dominohet nga “Jo-Jeta”

Lidion Kulla/SCAN

 

Tregu i sigurimeve në vendin tonë ka vijuar tendencën në rritje edhe gjatë muajit korrik të këtij viti. Sipas të dhënave të Autoritetit të Mbikëqyrjes Financiare, të ardhurat nga primet e shkruara bruto të sigurimit për periudhën janar-korrik kapën vlerën e rreth 14.2 miliardë lekëve, në rritje me 7.58% krahasuar me të njëjtën periudhë të një viti më parë. Edhe numri i kontratave të lidhura është rritur me 9.55%, duke arritur në 870,189 kontrata.

Edhe gjatë kësaj periudhe, tregu vijon të mbetet i orientuar tek sigurimet e Jo-Jetës, që zinin 91.65% të vëllimit të përgjithshëm të primeve, ndërsa sigurimet e Jetës mbajnë 8.31% dhe risigurimi 0.042%. Nëse e ndajmë tregun sipas llojit të sigurimit, primet e shkruara bruto të sigurimit vullnetar zënë 41.96% dhe primet e shkruara bruto të sigurimit të detyrueshëm zënë 58.04% të totalit të tregut.

Për 7-mujorin e këtij viti, dëmet e paguara bruto në tregun e sigurimeve, arritën në rreth 4.7 miliardë lekë, ose 21.5% më shumë, krahasuar me periudhën janar-korrik 2023. Pjesën më të madhe të dëmeve të paguara e mban sigurimi motorik që kapi vlerën e 3.4 miliardë lekëve, në rritje me 20.76% krahasuar me të njëjtën periudhë të një viti më parë.

Gjatë kësaj periudhe, primet e sigurimit të detyrueshëm motorik arritën rreth 8.2 miliardë lekë, ose 9.39% më shumë se një vit më parë. Produkti MTPL e brendshme, pati një rritje prej 11.2% të vëllimit të primeve të shkruara bruto, që u shoqërua edhe me një rritje të numrit të kontratave prej 10.8%.

Produkti Karton Jeshil pati një rritje prej 1.86% të vëllimit të primeve të shkruara bruto, ndërsa numri i kontratave u rrit me rreth 20%. Në anën tjetër, produkti Sigurim Kufitar, pati një rënie me 4.97%, ndërsa numri i kontratave u ul me 5.96%.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.