55% e popullsisë me internet 5G në 2027 – Hapet tenderi për përdorimin e brezit të frekuencave 3400-3800 MHz nga operatorët

Ledina Elezi/SCAN

Është hapur tenderi për dhënien e të drejtave të përdorimit në brezin e frekuencave 3400-3800 MHz, në 5 blloqe të organizuara për operatorët, të cilat do të nevojiten për zbatimin e rrjetit 5G. Të drejtat e përdorimit jepen me qëllim ndërtimin e rrjeteve tokësore të komunikimeve elektronike për të ofruar shërbime të komunikimeve elektronike në të gjithë territorin e Shqipërisë.

Sipas Autoritetit të Komunikimeve Elektronike dhe Postare, rreth 55% e popullsisë do të ketë mbulim me shërbim 5G deri në fund të vitit 2027, ndërsa pritet që deri në vitin 2030 të përdoret tekonologjia 5G nga 85% e popullsisë.

Deri në fund të vitit të ardhshëm, Porti i Durrësit, Vlorës, Shëngjinit, Sarandës, Porto Romanos, Aeroporti Ndërkombëtar i Tiranës, i Kukësit, Vlorës, Zona industriale Tiranë – Durrës, si dhe Qendrat Spitalore të Tiranës, do të kenë mbulim me shërbimin 5G në brezin e autorizuar, pjesë e spektrit 3.4 GHz – 3.8 GHz. Ky mbulim do të shtrihet në të gjitha qytetet e Shqipërisë deri në vitin 2028.

Afati i fundit për paraqitjen dhe hapjen e ofertave do të jetë 17 tetori, ndërsa vlera minimale e pranueshme për ofertuesit me qëllim dhënien e një autorizimi individual për përdorimin e frekuencave në brezin 3400-3800 MHz, do të jetë jo më pak se 3,6 milionë euro për një të drejtë përdorimi për bllok me 80 MHz dhe jo më pak se 1,8 milionë euro, për një të drejtë përdorimi për bllok me 40 MHz.

Në dokument theksohet se zonat e rëndësisë së veçantë, ku përfshihen zonat turistike, parqet kombëtare, rrugët, autostradat e tunelet, zona të përfshira në projekte zhvillimore të ndryshme, do të kenë përparësi për sa i takon mbulimit me rrjetin 5G.

Gjenerata e sistemeve celulare, e cila po zhvillohet aktualisht, rrit shpejtësinë e të dhënave të rrjeteve 4G me më shumë se 10 herë, duke përmirësuar teknikat e përdorimit të frekuencave.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.