“Të importohen vetëm mbetje druri” – Organizatat, shqetësime për pr.ligjin: Konsultim publik problematik, koha e rishikimit e shkurtër 

Ola Mitre/SCAN

 

Organizatat e shoqërisë civile kanë ngritur shqetësime në lidhje me projektligjin “Për menaxhimin e integruar të mbetjeve”, që ndër të tjera i hap rrugë importit të mbetjeve në vendin tonë.

Gjatë një tryeze diskutimi mbi draftin e nxjerrë për konsultim publik, u nxorr në pah se ligji po ndryshohet brenda një kohe shumë të shkurtër, nga rishikimet e fundit, ndërsa u theksua se vendi ynë duhet të lejojë vetëm importin e mbetjeve të drurit.

Po ashtu, gjatë takimit u nxorrën në pah problemet me platformën online të konsultimit publik, teksa u konsiderua i nevojshëm një konsultim më i gjerë, duke marrë në konsideratë se ky ligj ka rëndësi strategjike dhe prek një fushë shumë të gjerë.

Pjesëmarrësit në takim ngritën edhe problematika të tjera në drejtim të masave të gjobave të parashikuara, duke kërkuar jo vetëm që ato të jenë më të larta, por të vendoset si detyrim edhe rekuperimi i dëmit.

Të gjitha këto shqetësime do të paraqiten edhe pranë Ministrisë së Turizmit dhe Mjedisit, ndërsa do të kërkohet edhe konsultim publik gjithëpërfshirës, përpara se varianti final të miratohet.

 

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.