A po i vjen fundi Gjermanisë si superfuqi? – Humbja e gazit të lirë rus ishte goditja përfundimtare

Themelet e makinerisë industriale të Gjermanisë kanë rënë si domino: SHBA po largohet nga Europa dhe po kërkon të konkurrojë me aleatët e saj transatlantikë në investimet për klimën. Kina po bëhet një rival më i madh dhe nuk është më blerësi i pangopur i produkteve gjermane. Ndërsa humbja e gazit të lirë rus ishte goditja përfundimtare për shumë industri me energji intensive në Gjermani.

Krahas paqëndrueshmërisë globale, paraliza politike në Berlin po përkeqëson patologjitë vendase të vjetra si infrastruktura e pamjaftueshme, një fuqi punëtore në plakje dhe burokracitë. Sistemi arsimor dikur i drejtuar nga shteti tani është simbol i mungesës afatgjatë të investimeve në shërbimet publike. Në disa raste, dobësimi i industrisë reflektohet në uljen e planeve të investimeve. Diku tjetër, ai shprehet me ndryshimin e linjave të prodhimit dhe pushimet nga puna, dhe në disa raste me një bllokim të përhershëm.

Natyrisht, Gjermania ka ende një grup të lakmueshëm njësish të vogla prodhimi fleksibël. Edhe për këtë arsye, Bundesbank – dhe jo vetëm – nuk ndan mendimin se kolapsi i industrisë gjermane është shumë afër.

Michelin i Francës po mbyll dy nga fabrikat e saj në Gjermani dhe planet e saj të shkurtimit deri në fund të vitit 2025 do të prekin më shumë se 1500 punëtorë. Rivali i Michelin në SHBA, Goodyear, ka plane të ngjashme për dy njësi.sipas tyre situata ka mbërritur në një pikë ku nuk mund të eksportohen goma kamionësh nga Gjermania me çmime konkurruese. Dhe nëse Gjermania nuk mund të eksportojë në mënyrë konkurruese në kontekstin ndërkombëtar, vendi humbet një nga asetet e tij më të mëdha. Në të njëjtën mënyrë, GEA po mbyll një fabrikë pompash pranë Mainz për t’u zhvendosur në Poloni.

Prodhuesi i pjesëve të automjeteve Continental njoftoi planet verën e kaluar për të mbyllur një fabrikë të prodhimit të pjesëve të sigurisë dhe frenave. Kriza energjetike në verën e vitit 2022 ishte një katalizator i madh. Ndërsa më e keqja është shmangur, çmimet mbeten më të larta se në vendet e tjera.

Një nga sektorët më të goditur ishin kimikatet – një rezultat i drejtpërdrejtë i humbjes së gazit natyror të lirë rus. Ndërsa kalimi në hidrogjen të pastër mbetet i pasigurt, pothuajse një në 10 kompani planifikojnë të ndalojnë prodhimin përgjithmonë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.