SHBA nuk bën dot pa uranium – Në 2023, blerje rekord nga Rusia për 1.19 miliardë dollarë

Vitin e kaluar Shtetet e Bashkuara të Amerikës blenë uranium nga Rusia për një vlerë rekord prej 1.19 miliardë dollarësh. Importi amerikan i uraniumit nga Rusia është rritur në krahasim me vitin 2022, kur vlera e tij ishte 830 milionë dollarë.

Në vitin 2023, Uashingtoni bleu nga Moska paladium të papërpunuar për 1.08 miliardë dollarë, plehra minerale për 1.35 miliardë dollarë dhe motorë turboxhet për 91 milion dollarë. Vlera e eksporteve amerikane drejt Rusisë në vitin 2023 arriti në 597 milionë dollarë dhe në fjalë bëhet fjalë për mallra si produkte farmaceutike apo instrumente dhe pajisje mjekësore.

Sipas raportimeve të mediave ruse, pavarësisht sanksioneve, Uashingtoni vijoi të blente gjatë vitit të kaluar 193.2 milionë dollarë uranium në muaj. Kjo kontribuoi në rritjen prej 43% të vlerës totale vjetore të importeve të uraniumit nga Rusia.

Moska vijon të jetë furnizuesi kryesor i uraniumit për Shtetet e Bashkuara të Amerikës në terma monetare dhe renditet në vend të katërt për sa i përket volumit të furnizimeve sipas të dhënave të S&P Global.

SHBA ka rezervat e saj të uraniumit, por nuk arriti të plotësonte kërkesën e vendit për të fuqizuar industrinë bërthamore. Rusia regjistron kompleksin më të madh të pasurimit të uraniumit në glob.

Sipas vlerësimeve të ekspertëve do të duhen minimalisht pesë vjet dhe investime shumë domethënëse që SHBA të reduktojë varësinë e saj nga uraniumi rus, i cili është i domosdoshëm për furnizimin e reaktorëve bërthamorë. Energjia bërthamore është një përbërës i rëndësishëm në sektorin amerikan të energjisë, duke kontribuar në 20% të energjisë elektrike të prodhuar në vend.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.