Ankimohet tenderi për sistemin e tatimeve – Procedura synon vazhdimësinë e punës për tatimapaguesit, fondi limit 1.77 mln euro

Tenderi për mirëmbajtjen e sistemit elektronik tatimor e-Taxation, që synon sigurimin e vazhdimësisë së punës, ka përfunduar pranë Komisionit të Prokurimit Publik. Procedura e prokurimit publik mbi kufirin e lartë monetar, ka një fond limit prej 1.77 mln euro, pa TVSH, ndërsa u hap nga Agjencia Kombëtare e Shoqërisë së Informacionit gjatë muajit maj.

Shkak për bllokimin e tenderit është bërë ankesa e një operatori ekonomik, që kundërshton vendimin e Komisionit të Vlerësimit të Ofertave, për skualifikim të padrejtë. Kompania që do të shpallet fituese do të duhet të mirëmbajë sistemin për një periudhë 2-vjeçare nga momenti i nënshkrimit të kontratës, ndërsa përfshin të gjithë komponentët e sistemit, që janë: Aplikacioni C@TS, aplikacioni e-Filing, shërbimet e raportimit, komunikimi me palët e treta nëpërmjet Platformës Qeveritare të Ndërveprimit dhe shërbimet elektronike nëpërmjet platformës e-Albania.

Sistemi elektronik i taksave, që prej vitit 2015 shërben si një sistem i automatizuar për ofrimin e shërbimeve për Administratën Tatimore dhe Tatimpaguesit, duke i ardhur në ndihmë këtyre të fundit për të përmbushur detyrimet ligjore. Përmes këtij sistemi, përdoruesit kryejnë funksione të avancuara si mbledhjen, inspektimin dhe kontrollin e detyrimeve tatimore; krijimin e deklaratave të përgjegjësive të ndryshme tatimore, dorëzimin e listëpagesave, etj.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.