Argjentina anulon tatimin mbi të ardhurat – Përjashtim bëjnë ata që fitojnë më shumë se 5 mijë dollarë në muaj

Eliminim i tatimit mbi të ardhurat për pothuajse të gjithë punonjësit argjentinas. Parlamenti në Buenos Aires ka miratuar projektligjin, një masë e propozuar nga ministri i ekonomisë, Sergio Massa, pak javë përpara zgjedhjeve presidenciale, që do të mbahen në datë 22 tetor. Vetë Massa po merr pjesë në garën për ‘Casa Rosada’, në krye të partisë aktuale të qeverisë së qendrës së majtë, e cila u rendit vetëm e treta në zgjedhjet paraprake të gushtit.

Massa kishte nisur një përjashtim të përkohshëm nga tatimi mbi të ardhurat për 99% të punonjësve me një dekret. Ligji që mori dritën jeshile nga Senati i eliminon përfundimisht për 800 mijë punëtorë dhe pensionistë. Vetëm ata që fitojnë më shumë se 15 herë paga minimale federale, pra 1.77 milionë pesos në muaj – mbi 5 mijë dollarë, do të duhet të vazhdojnë të paguajnë tatimin.

Mes një mitingu elektoral dhe një reforme tatimore, ministri dhe kandidati për president po përpiqet të fitojë terren përballë kundërshtarëve të tij politikë. Vendimi i fundit i shtohet rritjeve të pensioneve dhe pagave të sektorit publik që sapo janë miratuar nga qeveria.

E gjithë kjo, sipas vlerësimeve të ekonomistëve, do të kushtojë rreth 5.7 miliardë dollarë, të cilat do të financohen në masë të madhe nga printimi i parave, duke nxitur inflacionin, në një situatë tashmë jashtë kontrollit. Indeksi i çmimeve të konsumit në Argjentinë është ndër më të lartët në botë. Në gusht, rritja vjetore kaloi 124%, më e larta që nga përfundimi i fazës së hiper-inflacionit në 1991. Në baza mujore, kostoja e jetesës u rrit me 12.4%.

Në një vend tashmë përsëri në prag të falimentimit, këto masa ushtrojnë presion edhe mbi programin e ndihmës të rënë dakord me Fondin Monetar Ndërkombëtar. Zëdhënësja e FMN-së, u shpreh se inflacioni në Argjentinë është shumë i lartë dhe vazhdon të rritet dhe masat e fundit shtojnë sfidat. FMN po punon për të kuptuar dhe vlerësuar më mirë ndikimin në financat publike dhe nevojën e mundshme për masa kompensuese, për të forcuar stabilitetin financiar dhe për të mbrojtur objektivat e rënë dakord.

Qeveria argjentinase i është zotuar FMN-së që këtë vit ta mbajë deficitin buxhetor brenda 1.9% të PBB-së, si pjesë e marrëveshjes për rifinancimin e borxhit prej 45 miliardë dollarësh, të arritur në vitin 2018 dhe që i nënshtrohet rishikimeve të vështira periodike.

Ndërkohë, kriza ekonomike e vendit po përkeqësohet dhe po zgjat në kohë. Në vlerësimet e fundit të OECD-së, Argjentina po përballet me një tkurrje prej 2% të PBB-së këtë vit, e ndjekur nga një rënie e mëtejshme prej 1.2% në vitin 2024, kur pritej një kthim në rritje.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.