Ekspertët shohin “fundin” e Gjermanisë! – Parashikojnë që këtë vit ekonomia të tkurret me 0,6%

Ekonomia gjermane do të shënojë një rënie prej 0.6 %, sipas parashikimit të fundit të përbashkët të instituteve ekonomike gjermane. Instituti për Kërkime Ekonomike IFO, thekson se ekonomia gjermane ka më shumë se një vit në rënie.

Rritja e mprehtë e çmimeve të energjisë gjatë vitit 2022 ndërpreu rimëkëmbjen nga pandemia dhe inflacioni i lartë vazhdon të ulë fuqinë blerëse të familjeve.

Norma bazë e interesit u rrit me më shumë se 4%, gjë që ndikoi veçanërisht në industrinë e ndërtimit. Për më tepër, politika e qeverisë gjermane shkakton pasiguri të madhe midis kompanive dhe familjeve, gjë që vështirëson planifikimin ekonomik dhe zvogëlon shanset për një dalje të shpejtë të ekonomisë nga kriza, thekson raporti i publikuar.

Për shkak të faktorëve të lartpërmendur, ekspertët ekonomikë e rishikuan në rënie parashikimin e rritjes ekonomike të pranverës, pasi pritej një rritje e lehtë e PBB-së gjermane në vitin 2023 prej 0.3 %.

Arsyeja kryesore për këtë korrigjim është rikuperimi më i ngadaltë i industrisë dhe konsumit gjerman sesa ishte supozuar në pranverë. Institutet ekonomike parashikojnë se ekonomia gjermane do të rritet me 1.3 % në vitin 2024.

Sipas parashikimit, ekspertët ekonomikë presin që papunësia të rritet mesatarisht në 2.6 milionë njerëz në vitin 2023. Norma e inflacionit pritet të jetë 6.1 % në vitin 2023 dhe të ulet në 2.6% për qind në vitin 2024. Ndërsa inflacioni bazë në Gjermani do të jetë 6.1 % këtë vit dhe do të bjerë në 3.1 % vitin e ardhshëm.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.