Ari, i qëndrueshëm pranë 2,000 USD – Mbështetet nga rënia e yield-it të obligacioneve në SHBA

Ari po ndryshon minimalisht në sesionin e sotëm dhe po tregtohet pranë 2,000 dollarëve për onz, për shkak të dobësimi të dollarit amerikan dhe rënies së yield-it të obligacioneve në SHBA. Kontrata “spot” e arit po qëndron në rreth 1995 dollarë për onz, ndërsa përkohësisht preku nivelin më të lartë në 3 javët e fundit, prej 2007 dollarë për onz.

Analistët parashikojnë se ari do të gjejë një mbështetje, të paktën në terma afatshkurtër, nga mbyllja e ciklit të rritjes së interesave në SHBA dhe nga dobësimi i dollarit. Indeksi që mat ecurinë e monedhës së gjelbër, përballë shportës me 6 monedhat kryesore ndërkombëtare po qëndron në rënie me rreth 0.2%, duke e bërë arin më pak të shtrenjtë për zotëruesit e monedhave të tjera.

Ndër të dhënat e publikuara në SHBA, numri i amerikanëve që aplikuan për përfitimin e asistencës së papunësisë ra më shumë se sa pritej javën e kaluar, por kjo ka të ngjarë të mos ndryshojë pikëpamjen se tregu i punës po ngadalësohet, mes normave më të larta të interesit.

Tregtarët presin gjerësisht se Rezerva Federale nuk do t’i ndryshojë normat e interesit në dhjetor. Normat më të ulëta të interesit ulin koston oportune të mbajtjes së arit. Zyrtarët e Fed ranë dakord në takimin e tyre të fundit se do të rrisnin normat e interesit vetëm nëse progresi në kontrollin e inflacionit do të lëkundet. Ndër metalet e tjera, argjendi po tregtohet në rreth 23.7 dollarë për onz, ndërsa platini po tregtohet në rreth 925 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.