ATP “ul qepenin”, zero kompensim për pronarët – 26 mungesa në staf, ish-drejtuesit nën hetim. Me ligj të pezulluar e me qindra padi çdo vit
Me ish-drejtoreshën dhe disa drejtues të tjerë në ndjekje penale, me 26 mungesa në staf, me një ligj të bllokuar nga Gjykata Kushtetuese dhe e mbytur nga qindra padi të akumuluara çdo vit, Agjencia e Trajtimit të Pronave në kuptimin e plotë të fjalës nuk ka kryer funksionin e saj gjatë këtij viti.
Scan Televizion ka zbardhur treguesit buxhetorë të Agjencisë për katër muajt e parë të vitit, ku bie në sy nuk është paguar asnjë lek për kompensimin e ish-pronarëve, arsyeja e kezistencës së Agjencisë. “Shpenzime për kompensimin e pronarëve 0%”, theksohet në raportin zyrtar të Agjencisë për katër muajt e parë të vitit.
Gjithë aktiviteti i ATP për katër muajt e këtij është reduktuar të shpërndarja e kësteve për 216 pronarë që kanë pranuar të heqin dorë nga shuma totale e kompensimit duke u mjagftuar vetëm me një përqindje të vogël të saj, si dhe te kompensimet e 244 pronarëve tokat e të cilëve janë zënë nga ndërtimet pa leje.
Gjithësesi, për këtë zë, Agjencia e Trajtimit të Pronave bën vetëm kalimin e findeve, pasi ai realizohet nga të ardhurat e realizuar nga ndërtimet informale të derdhura në llogari të ATP nga Agjencia Shtetërore e Kadstrës.
Ndërkohë që kundër saj akumulohen ccdo vit qindra padi nga pronarët. Gjatë këtij viti janë akumuluar disa qindra padi të reja, ndërkohë që gjatë vitit 2021, sektori I përfaqësimit ligjor i Agjencisë ka ankimuar mbi 800 vendime që kanë lidhje me paditë në gjykata të pronarëve, ndërkohë që planifikonte të mbyllte 1 mijë. Vetë Agjencia raporton se shkak është bërë mungesa e Gjyqtarëve të shkarkuar nga procesi i Vetting-ut, ndërkohë që situata pritet të përkeqësohet edhe më tej me reduktimin e nunmrit të gjykatave me hartën e re gjyqësore.
Ndërkohë që ndryshimet e sapomiratuara nga Ministria e Drejtësisë në Ligjin e Pronave, pritet të sjellin rritje të mëtjeshme të padive ndaj Agjencisë, për shkak se ato reduktojnë edhe më tej vlerat e kompensimeve që përfitojnë pronarët.
Ndryshimet në fjalë erdhën si pasojë e shfuqzimit të dy neneve të Ligjit për Trajtimin e Pronës nga Gjykata Kushtetuese në shkurt të vitit 2021, dhe një detyrimi nga Gjykata e Strasburgut që pronarët të kompensohen me jo më pak se 10% e vlerës reale të pronës. Ndërkohë që shoqatat e pronarëve paralajmërojnë se ndryshimet e sapomiratuara nga Ministria e Drejtësisë e ulin vlerën e kompensimit nën kufirin prej 10% të vendosur nga Strasburgu, shkak për të cilin do ta dërgojnë përsëri Ligjin në Kushtetuese.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.