Balotazh për presidentin e Maqedonisë së Veriut – Në garë më 8 maj, Davkova dhe Pendarovski

Në përfundim të zgjedhjeve presidenciale në Maqedoninë e Veriut në krye është kandidatja e mbështetur nga VMRO-DPMNE, Gordana Siljanovska Davkova, ndjekur nga Stevo Pendarovski i LSDM. Por, duke qenë se asnjë nga kandidatët nuk mori votat e duhura, më 8 maj do të zhvillohet raundi i dytë i zgjedhjeve, së bashku me ato parlamentare.

Aktualisht, Davkova ka fituar 40,23% të votave dhe Pendarovski rreth 20%. Kandidatët shqiptarë që garuan të ndarë janë renditur në vendin e tretë dhe të pestë. Kështu, Bujar Osmani i mbështetur nga BDI dhe Fronti Europian ka fituar 13,38% të votave, ndërsa Arben Taravari nga koalicioni VLEN, me 9,26%.

Sipas Komisionit Shtetëror Zgjedhor, pjesëmarrja në votime ishte 49,75%.

Gordana Siljanovska Davkova në një konferencë për mediat mbrëmjen e së mërkurës tha se ky rezultat është inspirues për të.

Ndërsa, Pendarovski, u shpreh i zhgënjyer nga rezultati, por shtoi se për raundin e dytë do të promovojë fort konceptin e një shteti të integruar, pa ndarje, duke pritur pjesëmarrje edhe më të madhe në votime.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.