Bashkitë, në fushatë “harrojnë” të punojnë – Përgjysmohet niveli i taksave të mbledhura në Shkurt, “joshen” votuesit

61 bashkitë në vend duket se e kanë nisur fushatën zgjedhore përpara hapjes zyrtare të saj, pasi kanë lënë tërësisht pas dore angazhimet e tyre.  Treguesit fiskale të publikuar nga Ministria e Financave, tregojnë qartazi performancën e pushtetit vendor, pasi të ardhurat e mbledhur në muajin Shkurt kanë rënë me 42.6 për qind  krahasuar me një vit më parë.  Konkretisht në shkurt të 2023, bashkitë kanë vjelur vetëm 1.5 miliardë lekë nga 2.6 miliardë lekë që u mblodhën një vit më parë.

Një rënie drastike regjistrohet edhe në raport me planin për të njëjtë periudhë, me afro 45.2 për qind.  Përpos angazhimit në fushatë, kjo perfomancë shpjegohet edhe me faktin se përgjatë kësaj periudhe pushteti vendor është më tolerant ndaj qytetarëve, pasi ka interes të sigurojë më shumë votues dhe të mbajë ata ekzistentë.

Të tre zërat e taksave që mblidhen nga bashkitë kanë pësuar një rënie të konsiderueshme. Konkretisht, nga taksat e pasurisë mbi ndërtesat janë mbledhur vetëm 2.2 milionë euro, me një rënie të regjistruar në 11.1 për qind në raport me të njëjtën periudhë të një vitit më parë dhe 28.7 për qind në raport me planin. Nga taksat lokale në Shkurt të 2023-shit janë mbledhur 11.1 milionë euro, me rënie në masën 46.4 për qind krahasuar me një vit më parë, dhe 47.8 për qind në raport me planin.

Rënie ka pasur edhe taksa mbi biznesin e vogël, por nga ky zë mblidhet një vlerë thuajse e pa konsiderueshme. I njëjti trend është edhe si 2-mujor dhe mesa duket do të vazhdojë deri në formimin dhe vënien në funksion të bashkive të reja që do të dalin nga zgjedhjet lokale të 14 majit.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.