BB, 75 milionë dollarë kredi për ujësjellësit – Do të shkojë për reformimin e sektorit, akordohet edhe një grant 6.3 milionë dollarë!

Bordi i Drejtorëve të Bankës Botërore ka miratuar një kredi prej 75 mln usd dhe një grant prej 6.3 mln USD për reformimin e sektorit të ujit në Shqipëri. Përmes një njoftimi për shtyp BB bëri me dije se kjo hua është pjesë e Programit Kombëtar prej 135 milionë USD për modernizimin e sektorit të ujësjellës-kanalizimeve në Shqipëri që bashkë financohet nga qeveria shqiptare.

Ndërkohë që, granti financohet nga Sekretariati Shtetëror Zviceran për Çështjet Ekonomike (SECO) dhe do të menaxhohet nga Banka Botërore. Programi synon përmirësimin e aktivitetit dhe gjendjes financiare të ndërmarrjeve të ujësjellës-kanalizimeve si dhe ofrimin e shërbimeve të përmirësuara të furnizimit me ujë në Shqipëri.

Sipas Bankës Botërore, Shqipërisë nuk i mungojnë burimet e bollshme ujore për t’i ofruar ujë të pijshëm, të freskët dhe të sigurt gjithë popullsisë. Megjithatë, shumica e shoqërive të ujësjellësve vijojnë të kenë performancë të ulët si teknike, ashtu edhe financiare.

“Kjo ndikon cilësinë e shërbimit për popullsinë dhe bizneset, si dhe pamundëson ofrimin e shërbimeve aty ku mungojnë, veçanërisht për popullsinë më të cenueshme në zonat periferike dhe rurale të vendit. Rreth 20 përqind e popullsisë rurale nuk mbulohet nga rrjeti i tubacioneve të ujësjellësve. Shumica e shoqërive të ujësjellësve, 37 nga 58 prej tyre varen thuajse tërësisht nga fondet e qeverisë qendrore”,-thuhet ndër të tjera në njoftim.

Kredia do të mbulojë një pjesë të nevojave për financim që ka sektori i ujësjellësve në vend. Sipas Strategjinë Kombëtare të Sektorit të Furnizimit me Ujë dhe Kanalizimeve, 2020-2030, furnizimi 24 orë me ujë do të arrihet në vitin 2029, ndërkohë vlera e investimeve që nevojiten është 1.5 mld euro. Ndërkohë që, duke marrë parasysh buxhetin vjetor 2023-2030 atëherë hendeku financiar përfundimtar është rreth 500 milion euro ose 30% e kostos totale të strategjisë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.