Rritet Mikrokredia, 261 mijë hua gjatë 2021 – Kompanitë: Mbështetëm veçanërisht sipërmarrjet bujqësore, norma 171% e caktuar nga BSH!

Pas një rënie për shkak të Pandemisë, shoqëritë e mikrokredisë ia janë kthyer ritmeve të qëndrueshme të rritjes gjatë 2021. Në total ato kanë disbursuar 261 mijë kredi gjatë vitit të shkuar.

Shoqata Mikrofinanca Shqiptare ka bërë këtë të premte bilancin e aktivitetit për vitin e shkuar, duke bërë me dije se numëron rreth 157 mijë klientë aktive. Raporti u bë publikim për mediat nga Sekretarja e Përgjithshme e Shoqatës, Brunilda Isaj, sipas së cilës norma mesatare e disbursimit të kredive të reja është rreth 250 milionë euro në vit.

Në një takim me gazetarët, Drejtuesit e kompanive shpjeguan se sektori gëzon një shëndet të mirë financiar, ashtu si dhe sistemi bankar, me një numër të moderuar kredish me vonesa si dhe likuiditet të lartë.

Mesatarja e interesave luhatet në harkun 20-25%, ndërkohë që vetëm për kreditë shumë të vogla me risk të lartë aplikohet norma prej 171% e përcaktuar si tavan nga Banka e Shqipërisë.

Sfida për sektorin, për vitin e ardhshëm do të jetë rritja e çmimeve për vitin 2022, duke qenë se inflacioni për shtresat e varfra është shumë më i lartë nga ai mesatar i llogaritur nga Banka e Shqipërisë.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.