BE dhe Koreja e Jugut: Plani i SHBA-së për uljen e taksave të automjeteve elektrike mund të shkelë rregullat e OBT-së!
Bashkimi Europian dhe Koreja e Jugut kanë ngritur shqetësime në lidhje me kreditimin e propozuar të taksave të SHBA-së për blerjet e automjeteve elektrike, duke thënë se ato mund të diskriminojnë automjetet e prodhimit të huaj dhe të shkelin rregullat e Organizatës Botërore të Tregtisë (OBT).
Sipas projektligjit prej 430 miliardë dollarësh për klimën dhe energjinë e miratuar nga Senati i SHBA-së të dielën, Kongresi do të heqë kufirin e kredisë ekzistuese prej 7,500 dollarësh për blerësit e automjeteve elektrike, por do të vendosë kufizime, duke përfshirë ndalimin e marrjes së kredisë për automjetet që nuk janë montuar në Amerikën e Veriut.
Ndalimi i kredive tatimore për automjetet e montuara jashtë Amerikës së Veriut do të hyjë në fuqi sapo Presidenti Joe Biden të nënshkruajë legjislacionin. Legjislacioni i propozuar përfshin gjithashtu dispozita që synojnë parandalimin e përdorimit të komponentëve të baterive ose mineraleve kritike që rrjedhin nga Kina.
BE ra dakord me Uashingtonin se kreditë tatimore janë një nxitje e rëndësishme për të nxitur kërkesën për EV dhe për të promovuar kalimin në transport të qëndrueshëm dhe një reduktim të emetimeve të gazeve serrë. Koreja e Jugut tha gjithashtu të enjten se u ka shprehur shqetësime Shteteve të Bashkuara se ligji mund të shkelë rregullat e OBT-së dhe një marrëveshje dypalëshe të tregtisë së lirë. Ministria e Tregtisë e Koresë së Jugut tha në një deklaratë se u ka kërkuar autoriteteve tregtare amerikane të lehtësojnë kërkesat e komponentëve të baterisë dhe montimit përfundimtar të automjeteve.
Ministria e Tregtisë e Koresë së Jugut mbajti një takim me prodhuesit e automjeteve Hyundai Motor dhe prodhuesit e baterive LG Energy Solution, Samsung SDI dhe SK. Sipas deklaratës, kompanitë i kërkuan Seulit t’i mbështeste në mënyrë që ligji të mos i vinte në disavantazh konkurrues në tregun amerikan.
Grupi i industrisë automobilistike të Koresë së Jugut të premten tha se i kishte dërguar një letër Dhomës së Përfaqësuesve të SHBA-së, duke kërkuar që Shtetet e Bashkuara të përfshijnë automjetet elektrike dhe komponentët e baterive të prodhuara ose të montuara në Korenë e Jugut si të pranueshme për përfitimet tatimore të SHBA-së, duke cituar marrëveshjen e Tregtisë së Lirë SHBA-Kore.
Hyundai tha se është “i zhgënjyer që legjislacioni aktual kufizon ashpër aksesin dhe opsionet e automjeteve elektrike për amerikanët dhe mund të ngadalësojë në mënyrë dramatike tranzicionin drejt lëvizshmërisë së qëndrueshme në këtë treg”. Hyundai, e cila importon automjetet e saj kryesore elektrike nga Koreja, ka njoftuar së fundmi investime amerikane prej 10 miliardë dollarësh duke përfshirë prodhimin e EV në Alabama dhe Gjeorgji.
Një grup prodhuesish të mëdhenj të automjeteve thanë javën e kaluar se shumica e modeleve EV nuk do të ishin të pranueshëm për kredi tatimore për shkak të kërkesave për pjesët e baterive dhe mineralet kritike që do të bliheshin nga Amerika e Veriut. Pushimi i taksave për EV është pjesë e Aktit të Reduktimit të Inflacionit, i cili ka të ngjarë të miratohet nga Dhoma e Përfaqësuesve të premten dhe më pas t’i dërgohet Biden për nënshkrimin e tij.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.