BE do t’i japë Ukrainës 18 miliardë euro ndihmë financiare për vitin 2023!

Mbështetja e vazhdueshme për Ukrainën dhe pozicionin strategjik të bllokut kundër Kinës dominoi diskutimet midis liderëve të BE-së në ditën e dytë të samitit të premten.

Presidentja e Komisionit Europian Ursula von der Leyen njoftoi se BE-ja do t’i japë Ukrainës deri në 18 miliardë euro ndihmë financiare gjatë gjithë vitit 2023 për të mbuluar nevojat themelore buxhetore të vendit të shkatërruar nga lufta.

Presidenti ukrainas Volodymyr Zelenskyy tha në fillim të këtij muaji vendit të tij do t’i duhen rreth 55 miliardë dollarë (56 miliardë euro) për të mbajtur deficitin buxhetor të vitit të ardhshëm dhe për të riparuar infrastrukturën e dëmtuar.

Fondi Monetar Ndërkombëtar (FMN) ka vlerësuar se, për vitin 2023, Ukrainës do t’i nevojiten ndërmjet 3 deri në 4 miliardë euro ndihmë të huaj në baza mujore për të mbajtur shërbimet e saj publike në funksion në sfondin e pushtimit rus.

Paratë pritet të vijnë nga BE, Shtetet e Bashkuara, Mbretëria e Bashkuar dhe vende të tjera perëndimore, së bashku me institucionet financiare ndërkombëtare.

Sipas Ursula von der Leyen, BE synon të kontribuojë me 1.5 miliardë euro në muaj, për një total prej 18 miliardë euro në vitin 2023. Presidenti i Komisionit nuk zbuloi detaje të mëtejshme dhe tha se puna për paketën e ardhshme ishte ende në fazat e hershme.

Deri më tani, blloku ishte zotuar të jepte 9 miliardë euro për Ukrainën në hua të jashtëzakonshme për të ndihmuar vendin të mbështesë buxhetin e tij për vitin 2022. Paratë po mblidhen nga Komisioni në tregjet ndërkombëtare dhe më pas mbulohen me garanci duke përdorur buxhetin e përbashkët të BE-së dhe kontributet kombëtare.

Por lirimi i kësaj ndihme makro-financiare është bllokuar nga diskutimet midis shteteve anëtare, disa prej të cilëve argumentojnë se paratë duhet të jepen në formën e granteve dhe jo në formën e kredive.

Deri më tani, vetëm 3 miliardë euro kanë arritur në Kiev, përveç një kredie të veçantë prej 1.2 miliardë eurosh, për një total prej 4.2 miliardë eurosh. Në një fjalim virtual drejtuar liderëve të BE-së, Presidenti Zelenskyy kritikoi vonesën e 6 miliardë eurove të mbetura.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.