BE konfirmon 250 mln euro financim për Shqipërinë – Balluku: Progres raporti reflekton reformat. Soreca: Asistencë për vijimin e tyre

Qeveria shqiptare e cilëson progres raportin i Komisionit Evropian për Shqipërinë  si dokumentin me qasjen më pozitive të hartuar deri më tani dhe që përçon ecurinë e reformave të ndërmarra në kuadër të anëtarësimit.

Gjatë konferencës së përbashkët me Ambasadorin Luigi Soreca, Zv.kryeministrja e Shqipërisë, Belinda Balluku listoi disa nga arritjet e përmendura në raport siç janë reforma në drejtësi, dalja nga lista gri e vendit sa i takon pastrimit të parave, qëndrueshmëria e ekonomisë përballë goditjeve, etj. Ndërsa bëri me dije se në kuadër fondeve IPA Shqipëria do të përfitojë nga BE 250 milionë euro.

Ndërsa i ngarkuari me punë i Delegacionit të BE, Luigi Soreca bëri me dije planin e Bashkimit Evropian për rritjen e qëndrueshme të vende të rajonit, i cili ka si qëllim rritjen ekonomike dhe reduktimin e gapit që ekziston midis vendeve europiane dhe atyre të Ballkanit.  Si dhe theksoi se do të vijojë asistenca financiare për Shqipërinë me qëllim përmbushjen e reformave nga ana e qeverisë.

Komisioni Evropian vëren progres në disa fusha në Shqipëri për vitin 2023. Në raportin prej 144 faqesh, Brukseli vlerëson ecurinë e mirë të reformës në drejtësi dhe shprehet pozitivisht për angazhimin e autoriteteve shqiptare ndaj objektivit strategjik të integrimit në BE.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.