BE: Na pret një vit i vështirë me zjarret – Përhapja kryesisht në jug të Europës për shkak të ndryshimeve klimatike

Bashkimi Europian parashikon një vit të vështirë për sa i përket zjarreve dhe është në bisedime për blerjen e avionëve që ndërhyjnë në vatrat e zjarrit për shuarjen e tij.

Mijëra zjarrfikës në jug të Europës po përballen me flakët e qindra vatrave zjarri nga Portugalia në Francë, në një kohë që temperaturat e larta po shënojnë rekorde të reja dhe po shkaktojnë qindra viktima.

Ndryshimet klimatike kanë shkaktuar një situatë shumë të favorshme për përhapjen e zjarreve për shkak të thatësirës dhe valës së të nxehtit duke bërë që flakët të përhapen shumë më shpejt dhe të qëndrojnë aktive më gjatë në kohë në krahasim me më parë. Janë gjithnjë e më shumë vendet që kërkojnë ndihmë emergjente për shuarjen e tyre.

Komisioneri i Bashkimit Europian për menaxhimin e krizave, Janez Lenarcic u shpreh se kjo verë do të jetë një sfidë e vërtetë për të gjithë. Ai shtoi se dhe vera e një viti më parë ishte e vështirë dhe u regjistruan nëntë aktivizime të mekanizmave për mbrojtjen civile të BE-së për zjarret në pyje. Ndërsa këtë vit janë pesë të tilla ndërkohë që vera është ende para.

Aktualisht, Bashkimi Europian koordinon dhe financon gadishmërinë e 12 avionëve zjarrfikës dhe një helikopteri nga vendet e BE-së, për shtetet që kërkojnë ndihmë gjatë krizave. Por në të ardhmen, BE planifikon të ketë avionët e saj vecanërisht për këtë lloj shërbimi, u shpreh Lenarçiç. Këta avionë do të blihen teknikisht nga shtetet anëtare, por do të financohen 100% nga Bashkimi Europian.

Lenarcic tha se BE ishte në bisedime me prodhuesit për të rifilluar prodhimin e avionëve amfibë që mbledhin ujë për të shuar zjarret. Ai nuk pranoi të përmendë kompanitë e përfshira, kontratat me të cilat ende nuk janë nënshkruar.

BE-ja ka dërguar avionë zjarrfikës në vende të ndryshme, përfshirë Portugalinë, Francën dhe Slloveninë këtë muaj. Gjithashtu 200 zjarrfikës nga vendet europiane u dërguan në Greqi për të mbështetur ekipet vendore që luftojnë zjarret.

Rritja e kërkesave për ndihmë si pasojë e fatkeqësive të ndryshme natyrore për shkak të ndryshimeve klimatike si përmbytjet, zjarret dhe thatësira është pasuar me rritjen e burimeve të nevojshme për të trajtuar krizat e tjera si pandemia COVID-19 dhe lufta në Ukrainë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.