Bie kredia për industrinë nxjerrëse, rritet për tregtinë e automjetet – Tetëmujori/ Huaja për biznesin përmirësohet pas luhatjeve në muajt e verës

Në fund të tetëmujorit të këtij viti kredia bankare për bizneset ka arritur në total 428.3 miliardë lekë, përfshirë edhe interesat, duke rikthyer ritmet e rritjes pas frenimit në dy muajt e parë të verës. Krahasuar me mujin korrik, kredia për bizneset është rritur me më shumë se 13 miliardë lekë, ndërkohë që sektori i tregtisë ka regjistruar edhe rritjen më të madhe. Nga 128,9 miliardë lekë në qershor, kredia për grupin Tregtia me shumicë dhe me pakicë; Riparimi i automjeteve dhe motoçikletave rezulton në 133,7 miliardë lekë në fund të tetëmujorit. Industria përpunuese është një tjetër grup që ka dhënë kontribut të konsiderueshëm në rritjen e vlerës totale të kredisë dhënë për biznesin gjatë tetëmujorit. Nga 47,2 miliardë lekë në muajin korrik, kredia për këtë sektor rezulton 49.1 miliardë lekë në fund të gushtit. Akomodimi dhe shërbimi ushqimor janë gjithashtu një grup tjetër me peshë të madhe në kredinë e re dhënë për tetëmujorin. Nga 34,6 miliardë lekë në qershor, kredia për këtë grup rezulton në mbi 36 miliardë në fund të periudhës.

Sa i përket grupeve me kontribut negativ në volumin total të kredisë për tetëmujorin, në krye të listës qëndron industria nxjerrëse. Nga Nga 5.2 miliardë lekë në korrik, kredia për këtë sektor ka rënë në 3.7 miliardë në gusht. Kontribut të konsiderueshëm në totalin e kredisë së re ka dhënë në fund të tetëmujorit grupi Bujqësia, Pyjet, Peshkimi. Nga 6.6 miliardë lekë në korrik, totali i kredisë për këtë sektor ka rënë në 6.1 miliardë në fund të gushtit.

Struktura e kredive të bizneseve sipas qëllimit ka mbetur përgjithësisht e pandryshuar gjatë viteve të fundit. Stoku i kredive të biznesit dominohet nga kreditë për blerje pajisjesh dhe pasurish të paluajtshme me përkatësisht 28% dhe 27%, si edhe nga kreditë-kufi dhe huatë për çelje biznesi që zënë përkatësisht 25% dhe 17%. Që nga fillimi i vitit 2020, rritja e kredisë për bizneset është ndikuar nga rritja e kredisë për kapital qarkullues dhe e kredisë për blerje pajisjesh, ndërkohë që gjatë vitit 2022, rritja është përcaktuar nga rritja në tepricën e kredisë – kufi.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.