Bien flukset hyrëse të kredisë në euro, për çfarë u mor – Përgjysmohet huaja për apartamente, rritje minimale për mallra të qëndrueshme

Kredia në euro ka shënuar frenim të fortë në muajin korrik, në nivelet me të ulëta që prej vitit të shkuar. Banka e Shqipërisë ka publikuar flukset hyrëse mujore të kredisë në euro për individët, të cilat rezultojnë në total 1.2 miliardë lekë, apo afërisht 12 milionë euro, në rënie të dukshme karahasuar me muajt e mëparshëm kur flukset e kredisë në monedhën e përbashkët evropiane luahteshin në vlerën mesatare 20 milionë euro në muaj. Muaji më i mirë për kredinë në euro ishte marsi i këtij viti, kur sistemi bankar dha një total prej 40 milionë eurosh hua.

Për muajin korrik, rënie ka shënuar edhe overdrafti, i cili nga 61 milionë në muajin qershor, ka rënë në 58.3 milionë në muajin korrik. Ndërkohë që thuasje është përgjysmuar kredia e re në eruo për blerje apartamentesh. Nga 1.5 miliardë lekë në muajin qershor, apo afërisht 15 milionë euro, ajo ka rënë në 897 milionë lekë, apo rreth 8 milionë euro në fund të korrikut.

Kredia për blerjen e mallarve të qëndrueshme ka qene e vetmja në rritje për muajin korrik, pavarësisht se me ritme shumë modeste. Kredia për këtë qëllim është rritur nga 189.26 në muajin qershor në 190.34 për korrikun. Tek mallrat e qëndrueshme hyjnë mallrat me terma të gjata përdorimi, si mobiljet apo makinat. E kundërta ka ndodhur me mallrat e paqëndrueshëm, ku përfhihen produktet me afat shumë të shkurtër përdorimi. 61 milionë lekë kredi janë marrë nëpër banka me këtë qëllim gjatë muajit korrik, në rënie të dukshme për muajt e mëparshëm.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.