Bill Gates, për Inteligjencën Artificiale – “Apelet për ndalimin e saj nuk do të zgjidhin sfidat”

Apelet për të ndaluar zhvillimin e inteligjencës artificiale nuk do t’i “zgjidhin sfidat” që presin njerëzimin. Është kjo deklarata e bashkëthemeluesit të Microsoft, Bill Gates, në komentet e tij të para publike që kur një letër e hapur ndezi një debat për të ardhmen e teknologjisë.

Ai tha se do të ishte më mirë që njerëzit të përqendroheshin në mënyrën më të mirë të përdorimit të zhvillimeve në Inteligjencën Artificiale, pasi ishte e vështirë të kuptohej se si një ‘pauzë’ mund të funksiononte globalisht.

Intervista e tij erdhi pas një letre të hapur – të publikuar javën e kaluar dhe të bashkë-nënshkruar nga Elon Musk dhe më shumë se 1000 ekspertë të Inteligjencës Artificiale – me anë të së cilës kërkohej një pauzë urgjente në zhvillimin e sistemeve “më të fuqishme” se GPT-4 i ri i OpenAI i mbështetur nga Microsoft. Kjo e fundit mund të zhvillojë biseda njerëzore, të kompozojë këngë dhe të përmbledhë dokumente të gjata.

Ekspertët, përfshirë bashkëthemeluesin e Apple, Steve Wozniak, thanë në letër se rreziqet dhe përfitimet e mundshme për shoqërinë duhet të rivlerësohen. Microsoft ka kërkuar të tejkalojë kolegët përmes investimeve shumë miliarda dollarësh në ChatGPT OpenAI.

Ndërsa aktualisht është i fokusuar me kohë të plotë në fondacionin filantropik Bill dhe Melinda Gates, Gates ka qenë një mbështetës i fortë i AI dhe e përshkroi atë si revolucionar si interneti dhe të telefonave celularë.

Në një blog të titulluar “Epoka e AI ka filluar”, ai tha se beson se Inteligjenca Artificiale duhet të përdoret për të ndihmuar në uljen e disa prej pabarazive më të këqija në botë. Ai gjithashtu tha në intervistë se detajet e çdo pauze do të ishin të komplikuara për t’u zbatuar.

Ndërkohë presidenti i Shteteve të Bashkuara të Amerikës, Joe Biden, u shpreh se  mbetet për t’u parë nëse inteligjenca artificiale është e rrezikshme, por ai theksoi se kompanitë e teknologjisë kanë përgjegjësi për të konfirmuar që produktet e tyre të jenë të sigurta përpara se t’i bëjnë ato publike.

Biden u tha këshilltarëve të tij për shkencën dhe teknologjinë se Inteligjenca Artificiale mund të ndihmonte në trajtimin e sëmundjeve dhe ndryshimeve klimatike, por ishte gjithashtu e rëndësishme që të merret në konsideratë dhe rreziku i mundshëm. Kur u pyet nëse Inteligjenca Artificiale ishte e rrezikshme, kreu i Shtëpisë së Bardhë u shpreh se kjo mbetet për t’u parë, pasi dhe mund të jetë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.