Biokarburantet, qeveria rikthen planet për përdorimin – Planet, 10% për vitet 2024-2025. Ligji i ri nuk është miratuar ende

Politikat e zhvillimit të energjisë së rinovueshme do të synojnë të rrisin përdorimin e biokarburanteve në sektorin e transportit me 10% për vitet 2024-2025”. Kjo sipas relacionit që shoqëron projektbuxhetin e vitit 2024, ku jepen detaje mbi programin “Mbështetje për energjinë”. Gjithsesi, ndonëse objektivat e vendosura nga qeveria janë të qarta, projektligji “Për prodhimin, transportimin dhe tregtimin e biokarburanteve”, nuk është miratuar ende.

Përpjekjet e fundit për një ligj që do të rregullonte sektorin i përkasin prillit të këtij viti, kur Ministria e Infrastrukturës dhe Energjisë nxorri për konsultim publik një ligj tërësisht të ri, pas një dokumenti të depozituar në Kuvend 4 vite më parë.

Nëse i referohemi draftit të fundit, përveçse përcaktohen objektivat në drejtim të përdorimit të biokarburanteve, i jepet përprësi edhe politikave nxitëse për kultivimin e bimëve energjetike, që shërbejnë për prodhimin e biokarburanteve. Më konkretisht, drafti parashikon që sasia minimale vjetore në treg e biokarburanteve dhe e lëndëve të tjera djegëse, të rinovueshme, për transport, duhet të jetë jo më pak se 5 për qind të sasisë të konsumuar në sektorin e transportit në vitin 2024.

Nga viti 2025 e në vazhdim, kjo sasi do të jetë jo më pak se 10%. Sipas relacionit shoqërues, ligji ka qëllim promovimin e kontributit në përmbushjen e angazhimeve për emisionet e gazeve që vijnë nga konsumi i hidrokarbureve në këtë sektor, duke qenë se transporti është kontribuesi më i madh i CO2 dhe në përmasat e vendit, ndikon në ndryshimet klimatike.

Po ashtu, sipas relacionit, qëllimi i ligjit është të krijohen politika nxitëse për kultivimin të bimëve energjetike ne Shqipëri, për të mbrojtur mjedisin nëpërmjet respektimit të kritereve të qëndrueshmërisë për prodhimin e biokarburanteve, biolëngjeve dhe biogazeve. Sipas ekspertëve, ndër speciet bimore që mund të përdoren për prodhimin e biokarburanteve janë: Soja, misri, kallami i sheqerit, luledielli, eukalipti, palmat, etj.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.