Bitcoin rikuperon një pjesë të humbjeve – El Salvadori pritet të emetojë obligacionet e para në bitcoin

Bitcoin është rritur ndjeshëm në sesionin e sotëm, pas humbjeve me rreth 8% në sesionin e kaluar. Sipas përllogaritjeve, kontratat “futures” në tregun e kriptomonedhave humbën mbi 500 milionë dollarë në pozicionet e likuidimeve, pasi paqëndrueshmëria e madhe ndikoi në kontratat afatgjata dhe afatshkurtra, me disa kriptomonedha që ranë deri në 12%.

Likuidimet ndodhin kur një bursë mbyll automatikisht një pozicion të një tregtari, për shkak të humbjes së pjesshme ose totale të marzhit fillestar, që do të thotë se tregtari nuk ka fonde të mjaftueshme për të mbajtur tregtinë e hapur.

Ndërsa përsa i përket rritjes së fundit të bitcoin, disa analistë shprehen se ajo u mbështet nga baza të forta, që e katapultojnë kriptomonedhën në një epokë “të paparë më herët”. Analistët deklarojnë se pritet një interes i madh për bitcoin në vitin 2024, për shkak të miratimeve të pritshme të ETF-ve, ulja e normave të interesit nga bankat qendrore dhe “përgjysmimi” i gjenerimit të bitcoin, një proces që ndodh një herë në 4 vjet.

Ndër zhvillimet e tjera, El Salvadori pritet të emetojë obligacionet e shumëpritura në Bitcoin. Qeveria njoftoi të martën se ka marrë miratimin nga rregullatorët, ndërsa emetimi do të kryhet në fillim të vitit 2024, në platformën Bitfinex Securities, një divizion i rregulluar i platformës së këmbimit të kriptomonedhave, Bitfinex.

“Oligacionet Vullkan sapo kanë marrë miratimin rregullator nga Komisioni i Aseteve Dixhitale”, njoftoi Zyra Kombëtare e Bitcoin në El Salvador, në rrjetin social X. “Ne parashikojmë që obligacioni të emetohet gjatë tremujorit të parë të vitit 2024”, thuhet më tej.

Të ashtuquajturat “obligacione Vullkan” u shpallën në vitin 2021 nga Presidenti Nayib Bukele, menjëherë pasi ai miratoi një ligj që njeh bitcoin (BTC) si mjet ligjor në vend. Objektivi i Bukele ishte të mblidhte 1 miliard dollarë nëpërmjet obligacioneve të mbështetura nga bitcoin. Emetimi fillimisht ishte planifikuar për në mars 2022, por u shty disa herë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.