Bitcoin stabilizohet pranë 35,000 USD – Britania, plan për të përdorur “stablecoins” në ekonominë reale

Pas fitimeve të realizuara një ditë më parë, bitcoin po qëndron në rënie të lehtë në sesionin e sotëm, por vijon të tregtohet në mbi 35 mijë dollarë. Tregu i kriptomonedhave në tërësi vijon të karakterizohet nga optimizmi se shumë shpejt Komisioni i Letrave me Vlerë dhe Shkëmbimeve në SHBA do të miratojë ETF-të e para në bitcoin.

Kompani gjigante në menaxhimin e aseteve, si Blackrock apo Infinity, kanë aplikuar pranë këtij autoriteti për të pasur një Fond të Tregtueshëm në Shkëmbim në bitcoin. Të hënën, një gjykatë federale e apelit në SHBA zyrtarizoi një fitore për Grayscale Investments LLC në përpjekjen e saj për të krijuar një ETF të bazuar në Bitcoin.

Gjatë këtij viti, ndërkohë, kriptomonedha më e madhe në botë thuajse e ka dyfishuar vlerën e saj. Bitcoin ra me 64% vitin e kaluar, mes skandaleve të industrisë dhe falimentimeve, ndërsa në nëntor të vitit 2021 arriti rekordin historik prej gati 69,000 dollarë.

Pritshmëritë në rritje se Komisioni i Letrave me Vlerë dhe Shkëmbime në SHBA do të autorizojë Fondet e Tregtuara në Shkëmbim (ETF) që investojnë drejtpërdrejt në bitcoin, kanë nxitur një rritje prej më shumë se 25% të bitcoin, gjatë dy javëve të fundit.

Ndërsa çmimet e Bitcoin mund të përjetojnë një tërheqje afatshkurtër, monedha është e gatshme të vazhdojë të rritet në afat të gjatë. Ndër zhvillimet e tjera, Banka e Anglisë dhe Autoriteti i Sjelljes Financiare në Mbretërinë e Bashkuar po parashtrojnë propozime që do të sjellin monedhat e qëndrueshme apo “stablecoins” në ekonominë reale, si një mundësi pagesash për mallra dhe shërbime.

Sipas propozimeve, Banka e Anglisë do të jetë përgjegjëse për mbikëqyrjen e drejtpërdrejtë të njësisë ekonomike të “stablecoin”. Propozimet janë hapi i fundit në përpjekjen e Mbretërisë së Bashkuar për tu bërë një qendër për asetet dixhitale mes shqetësimeve se Brexit kërcënon dominimin e Londrës si qendra kryesore financiare e Evropës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.