Nafta, në nivelin më të ulët në 3 muaj – Ndikon ngadalësimi i kërkesës në SHBA dhe në Kinë

Nafta ka vijuar tendencën në rënie edhe në sesionin e sotëm, duke prekur nivelin më të ulët në 3 muajt e fundit, pasi të dhënat e industrisë në SHBA sugjerojnë një rritje të rezervave, gjatë javës së kaluar.

Gjithashtu, edhe të dhënat jo shumë optimiste mbi ekonominë kineze kanë rikthyer shqetësimet për ngadalësimin e kërkesës për naftë, nga importuesi më i madh i naftës në botë. Nafta Brent e Londrës po tregtohet në rreth 81 dollarë për fuçi, ndërsa nafta Bruto amerikane po tregtohet në rreth 77 dollarë për fuçi.

Të dyja kontratat kanë prekur nivelin më të ulët që nga 24 korriku dhe kanë zbritur poshtë niveleve të 6 tetorit, përpara se Hamasi të kryente sulmin ndaj Izraelit. Rezervat e naftës në SHBA u rritën me 12 milionë fuçi, gjatë javës së kaluar, njoftoi Instituti Amerikan i Naftës.

Megjithatë, analistët po presin të dhënat zyrtare që do të publikohen më vonë gjatë ditës së sotme, nga Administrata për Informimin mbi Energjinë. Agjencia njoftoi të martën se, prodhimi i naftës bruto në Shtetet e Bashkuara do të rritet me pak se sa vlerësohej më parë, ndërsa kërkesa do të bjerë.

Tashmë, kjo agjenci pret që konsumi total i naftës në SHBA të bjerë me 300,000 fuçi në ditë, duke përmbysur parashikimin e saj të mëparshëm për një rritje prej 100,000 fuçi në ditë. Ndërkohë, të dhënat në Kinë, që është konsumatori më i madh në botë i naftës, ngritën gjithashtu dyshime mbi perspektivën e kërkesës.

Importet e naftës bruto treguan rritje të fuqishme në tetor, por eksportet totale të mallrave dhe shërbimeve u tkurrën me një ritëm më të shpejtë se sa pritej, duke shtuar frikën për një kërkesë më të ulët globale për energji. Presioni mbi çmimet e naftës është shtuar edhe nga forcimi modest i dollarit amerikan, që e bën naftën më të shtrenjtë për zotëruesit e monedhave të tjera.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.