Sesioni i tretë në rritje për dollarin – Investitorët po presin komentet e shefit të FED, Jerome PoWell

Dollari amerikan po qëndron në rritje edhe në sesionin e sotëm, duke publikuar fitime për të tretën ditë me radhë, pasi disa ligjvënës në SHBA e kanë lënë të hapur mundësinë e një tjetër rritje të normës bazë të interesit. Për këtë arsye, investitorët po presin me shumë interes komentet e shefit të Rezervës Federale, Jerome Powell, sot dhe nesër.

Monedha e gjelbër, që preku nivelin më të ulët në 7 muaj në fillim të javës, ka gjetur një mbështetje në ditët e fundit për shkak të paqartësive nëse do të ketë ose jo edhe një rritje tjetër të interesave. Analistët vlerësojnë 15% mundësi për një tjetër rritje të normave të interesit në takimin e janarit, por ekzistojnë edhe 20% shanse për uljen e tyre në muajin mars.

Paundi britanik, që më herët gjatë javës preku nivelin më të ulët në 7 javët e fundit, po tregtohet në rreth 1.2280 dollarë. Indeksi që mat ecurinë e dollarit amerikan përballë shportës me 6 monedhat kryesore ndërkombëtare po qëndron në rreth 105.6, duke u rimëkëmbur nga niveli më i ulët në 4 muajt e fundit, që regjistroi javën e kaluar.

Në anën tjetër, euro po qëndron në rënie të lehtë dhe po këmbehet me rreth 1.0670 dollarë, pasi të dhënat e publikuara në Gjermani treguan se, prodhimi industrial ra më shumë se parashikimet, gjatë shtatorit.

Analistët shprehen se, mund të shohim një forcim të mëtejshëm të dollarit amerikan, duke supozuar se Powell do t’i rikujtojë tregjeve narrativën “për norma të larta interesi për një kohë më të gjatë”. Në sesionin e kaluar, dollari australian humbi rreth 0.8% të vlerës, humbjet më të mëdha ditore në rreth 1 muaj. Banka Qendrore e Australisë, rriti të martën normat e interesit me 25 pikë përqindje, duke e çuar në nivelin më të lartë në 12 vitet e fundit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.