Bitcoin zbret poshtë 37,000 USD – Java pritet të karakterizohet nga luhatje të mëdha

Tregu i kriptomonedhave po qëndron në rënie në sesionin e parë të kësaj jave, me Bitcoin që ka zbritur poshtë 37,000 dollarëve, por po tregtohet pranë niveleve më të larta të 18 muajve të fundit.

Analistët shprehen se kjo javë do të karakterizohet nga luhatje të mëdha, për shkak se do të publikohen disa raporte të rëndësishme që mund të diktojnë ecurinë e çmimeve. Ndërkohë, gjatë muajit nëntor bitcoin është rritur me rreth 8%, një rritje e përafërt edhe me vitet e kaluara, ndërsa për tremujorin e katërt të vitit është rritur me rreth 40%.

Në fokus të tregjeve të kriptomonedhave do të jetë Rezerva Federale në SHBA, e cila do të publikojë studimin e vet mbi inflacionin bazë, që mund të japë një panoramë më të qartë mbi të ardhmen e normave të interesit.

Gjithashtu, presidenti i Rezervës Federale, Jerome Powell do të mbajë një fjalim më 1 dhjetor dhe mund të japë më tepër detaje se kur do të vijë ulja e parë e interesave në SHBA. Gjithashtu, me shumë interes do të jetë edhe Prodhimi i Brendshëm Bruto për tremujorin e tretë të vitit dhe Shpenzimet e Konsumit Personal, që do të publikohen më 29 dhe 30 nëntor respektivisht. Më herët, të dhënat e publikuara në SHBA treguan se inflacioni po ngadalësohej më shpejt se parashikimet e tregjeve, duke rritur oreksin e investitorëve për asete me risk.

Gjatë dy muajve të fundit, tregu i kriptomonedhave është karakterizuar nga optimizmi se shumë shpejt do të miratohen edhe fondet e para ETF në bitcoin dhe ethereum. Komisioni i Letrave me Vlerë dhe Shkëmbime në SHBA pritet të miratojë në fillim të janarit fondet e para të tregtuara në shkëmbim, që do të ishte një moment historik për tregun e kriptomonedhave, pasi do t’u siguronte investitorëve tradicionalë një rrugë të rregulluar për të investuar në bitcoin dhe në kriptovaluta të tjera, përmes tregjeve të aksioneve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.