Bursat europiane e nisin javën në rënie – Pritet të publikojnë fitime mujore prej 6%, gjatë nëntorit

Bursat europiane po qëndrojnë në rënie në sesionin e sotëm, duke u tërhequr lehtë nga niveli me i lartë që nga 20 shtatori të regjistruar të premten. Indeksi pan-Europian Stoxx 600 po qëndron në rënie me 0.2%, ndërsa sektori i naftës dhe gazit kryeson humbjet, në rënie me 0.7%.

Ky indeks është rritur në mënyrë të qëndrueshme, gjatë nëntorit dhe pritet të realizojë fitime mujore prej rreth 6%, performanca më e mirë që nga janari i këtij viti. Investitorët në Europë po presin edhe fjalimin që do të mbajë presidentja e Bankës Qendrore Europiane, Christine Lagarde, përpara Parlamentit Europian.

Edhe shumica e tregjeve në rajonin e Azi-Paqësorit e nisën javën në rënie, për shkak të krizës në sektorin e pronave në Kinë, ndërsa në Japoni inflacioni në sektorin e shërbimeve u rrit në nivelin më të lartë në 45 muaj.

Ndërkohë, Wall Street realizoi fitime për të katërtën javë me radhë, gjatë javës së kaluar, për shkak të rënies së yield-it të obligacioneve në SHBA. Gjatë ditës së sotme nuk priten shumë të dhëna të rëndësishme dhe investitorët kanë qënë të fokusuar te shitjet që realizuan kompanitë gjatë së Premtes së Zezë. Më vonë gjatë javës, ndërkohë, do të publikohen disa të dhëna të rëndësishme, si inflacioni në SHBA dhe në Europë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.