Bizneseve u kthehen 218 milionë euro TVSH – Refuzohen 41% e kërkesave për mosplotësim dokumentacioni

Përgjatë vitit 2023, bizneset kanë marrë mbrapsht në formën e rimbursimit të TVSH-së afro 218 milionë euro. Referuar të dhënave zyrtare nga Drejtoria e Përgjithshme e Tatimeve, të siguruara nga SCAN TV,   gjatë periudhës Janar – Dhjetor 2023, janë regjistruar 2877 kërkesa për rimbursim nga 2027 kërkesa të regjistruara në 2022, me vlere totale 49.5 miliardë lekë.

Gjithsej janë pranuar 1690 kërkesa, me një rritje në numër rreth 13.9% krahasuar me 2022, me vlere 28.7 miliardë lekë, ndërsa 1187 kërkesa me vlerë 20.8 miliardë lekë apo 41 % e totalit,  nuk janë pranuar për mosplotësim të kritereve ligjore.

Nga 1690 kërkesa të pranuara, 96 prej tyre janë bërë nga tatimpagues të klasifikuar si eksportues me Risk Zero, kërkesa e të cilëve duhet te miratohen dhe rimbursohet automatikisht brenda 30 ditëve; 874 kërkesa janë bërë nga tatimpagues te klasifikuar si eksportues, me afat rimbursimi gjithashtu brenda 30 ditëve dhe 720 kërkesa janë bere nga tatimpagues të klasifikuar si jo-eksportues, me afat rimbursimi brenda 60 ditëve.

Kështu sipas të dhënave të tatimeve, referuar kërkesave të miratuara, vitin që lamë pas janë rimbursuar në total (FIFO  + Këste) 22.6 miliardë lekë ose 218 milionë euro, apo  rreth 0.64 % me shume se ne 2022 .

Janë miratuar dhe rimbursuar 1659 kërkesa të trajtuara sipas metodës FIFO (nga me një rritje ne vlere rreth 4.1 % krahasuar me 2022. Sipas tatimeve, të gjitha kërkesat FIFO te miratuara për periudhën Janar – Dhjetor 2023 janë rimbursuar në kohë, duke bërë që të mos ketë stok të kërkesave në fund të vitit 2023. 56 % te kërkesave janë procesuar brenda 30 ditëve dhe pjesa tjetër brenda afatit 60-ditor.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.