Blegtoria po ‘shuhet’ me ritme të shpejta në Shqipëri! – Analiza e shifrave/ Në 5 vitet e fundit shqiptarët po orientohen drejt pulave e bletëve
Blegtoria ka qenë dikur aktiviteti kryesor ekonomik i Shqipërisë por tashmë duket se po shkon drejt ‘shuarjes’ me ritme shumë të shpejta. Në 5 vitet e fundit, numri i krerëve është pakësuar ndjeshëm, ashtu sikurse dhe prodhimi i mishit dhe qumështit.
Mbarështimi i bagëtive është një aktivitet që po pakësohet me ritme të shpejta në Shqipëri. Nëse analizojmë shifrat e INSTAT, rezulton se në 5 vitet e fundit ka një rënie të fortë të numrit të krerëve që mbarështohen në vend.
Më konkretisht, në 5 vite numri i gjedhëve është pakësuar me 139 mijë krerë brenda 5 vitesh. Mesatarisht, çdo vit pakësimi është me rreth 30 mijë krerë.
E njëjta tendencë konstatohet edhe më lopët, numri i të cilave ka rënë me 72 mijë krerë në 5 vitet e fundit. Mesatarisht, pakësimi është me rreth 14.4 mijë krerë në vit.
Sa i përket bagëtive të imta, në 5 vite numri i tyre ka një rritje modeste me rreth 28 mijë më shumë. Në këtë mënyrë, Shqipëria po prodhon edhe më pak mish, ku në 5 vite prodhimi është pakësuar me 13 mijë tonë dhe i qumështit me 143 mijë tonë më pak.
Sa i përket mbarështimit të shpendëve, në vend ka një rritje me 73 mijë krerë më shumë ndërsa sa i përket mbarështimit të bletëve, numri i koshereve po qëndron në ritme të njëjta.
Një nga arsyet që mund të ketë ndikuar në ndryshimin e tendencës së blegtorisë është edhe mungesa e fuqisë punëtorë si rrjedhojë e emigracionit të të rinjve.
Ndryshe ndodh me bujqësinë që në vitet e fundit ka njohur ritme të mira zhvillimi.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.