Bonot, të qendrueshme, obligacionet rritje të lehtë – Letrat me vlerë të qeverisë përgjatë gjithë vitit të ankoruara pranë normes bazë të BSH

Rritja e normës bazë të interesit nga ana e Bankës së Shqipërisë në fillim të këtij muaji ka ndryshuar disi trajektoren e yielde-ve të letrave me vlerë të Qeverisë, por jo faktin që ato mbeten të ankoruara fare pranë kësaj norme.

Yield-i 12-mujor shënoi 3.1% në ankandin e fundit në muajin tetor, duke rezultuar i njëjtë me mesataren e tremujorit të tretë dhe poshtë vlerave të gjysmës së parë të vitit. Ndërkohë, primet e obligacioneve 3-, 5-, 7- dhe 15-vjeçare regjistruan një rritje mesatare prej rreth 0.26 p.p. këtë periudhë. Gjithsesi, niveli i tyre mbetet shumë më poshtë se vlerat e fillimit të vitit dhe ato të një viti më parë.

Kurba e yield-eve ka pasqyruar këto zhvillime, duke rritur margjinalisht pjerrësinë dhe nivelin në krahasim me fundin e tremujorit të dytë. Në një këndvështrim afatgjatë, pjerrësia e kurbës së yield-eve nuk ka pësuar ndryshime thelbësore.

Në këtë këndvështrim, Yield-et e letrave me vlerë të qeverisë nuk kanë shfaqur ndryshime të theksuara në tremujorin e tretë, ndërkohë që diferenca e tyre nga norma bazë mbetet minimale. Prej fillimit të vitit, yield-et në tregun primar kanë qenë në kahun rënës, por duke filluar nga muaji gusht, primet e bonove ndaluan uljen, ndërkohë yield-et afatgjata regjistruan rritje minimale. Ecuria e yield-eve ka reflektuar zhvendosjen e strukturës së financimit, nga bonot drejt obligacioneve afatgjata nga ana e qeverisë në muajt e fundit.

Përtej zhvillimeve mujore, panorama e përgjithshme e yield-eve tregon për prime rreziku të përmbajtura në kushtet kur diferenca e yield-it 12-mujor me normën bazë, diferenca mes këtij të fundit dhe yield-eve afatgjata, si dhe ajo midis yield-eve maksimale dhe minimale të kërkuara në ankande, mbeten të ulëta.

Megjithatë, me ndërhyrjen e fundit të Bankës së Shqipërisë që ngriti në 3.25 normën bazë të interesit, pritet që Yield-et e letrave me vlerë të qeverisë mbetën të ankoruara pranë normës bazë në afatin e shkurtër, por me tendenca të lexueshme rritjeje në afatin e gjatë.

Lorenc Rabeta/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.