“Boom” licencash për tregtim energjie – Në vitin 2022 morën “OK” 16 kompani, numri më i lartë ndër vite

Viti 2022 shënoi një kërkesë në rritje për licencim në tregtimin e energjisë elektrike. Sipas të dhënave nga Enti Rregullator i Energjisë, gjatë vitit që lamë pas 16 kompani u licencuan në ushtrimin e kësaj veprimtarie, një shifër e lartë në raport me vitet e kaluar. Kjo pasi, gjatë vitit 2021 u dhanë 7 licenca, ndërsa në 2020-ën vetëm 2 të tilla.

Edhe në vitet e mëparshëm numri i licencave të reja ka qenë ndjeshëm më i ulët se 2022-i.

Paralelisht, gjatë vitit që lamë pas edhe 5 subjekte të tjerë rinovuan licencat, që dispononin më herët. Rritja e interesit për këtë aktivitet erdhi në një kohë kur tregjet e energjisë elektrike ishin të paqëndrueshme, ndërkohë që Koroprata Elektorenergjetike Shqiptare, që menaxhonte shit-blerjet kryente procedura të shpeshta në këtë drejtim.

Sipas të dhënave zyrtare, KESH e blinte në shtrenjtë dhe e shiste më lirë energjinë se çmimet në Bursën Hungareze. Ndërkohë që, përveç kritikave të ekspertëve, nuk munguan as akuzat e opozitës për ndarje fitimesh.

Sipas legjislacionit në fuqi, tregtimi i energjisë elektrike është procesi që kryhet nga një person juridik që blen energji elektrike, me qëllim rishitjen e saj brenda ose jashtë sistemit të vendit ku kryen veprimtarinë. Në total, numri i të licencuarve në tregtimin e energjisë elektrike është 116.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.