BQE: Rimëkëmbja do më shumë kohë! Ekonomia europiane po përballet me pasojat e krizës së energjisë

Aktualisht çmimet e konsumit në Europë po rriten me një normë vjetore që tejkalon 8%, shumë më shumë se objektivi i Bankës Qendrore Europiane prej 2%.

Anëtarët e këshillit drejtues të bankës konfirmuan synimin e tyre për të rritur normat e interesit së shpejti. Por BQE e sheh veten në një pozitë të ndërlikuar. Ajo po  përballet jo vetëm me çmimet në rritje, të cilat mund të garantojnë rritje të shpejtë të normave, por edhe me perspektiva më të zymta të rritjes, të cilat kërkojnë më shumë kohë dhe durim. Shkaku kryesor i të dy zhvillimeve është rritja e çmimit të energjisë.

Çmimet e naftës dhe gazit natyror ishin rritur tashmë përpara pushtimit rus të Ukrainës, por lufta bëri që çmimet të rriteshin akoma më shumë. Rritja e çmimeve të mallrave ka luajtur një rol shumë më të madh në rritjen e inflacionit në Europë sesa në Amerikë.

Sipas Goldman Sachs, çmimet e energjisë në zonën e euros – të cilat u rritën me një normë vjetore prej 39% në maj, kanë rritur me 4% inflacionin total në krahasim me 2% në Amerikë. Efektet kanë filluar të ndikojnë edhe në çmimet e tjera të mallrave. Inflacioni “bazë”, i cili përjashton çmimet e ushqimeve dhe energjisë, u rrit më shpejt në eurozonë në maj nga sa prisnin ekonomistët.

Rezultati i gjithë kësaj është një goditje e madhe për kostot e bizneseve dhe fuqinë blerëse të familjeve. Ndërprerjet e furnizimit si rezultat i bllokimeve të fundit të Kinës dhe çmimet e larta të energjisë po dëmtojnë bizneset, me Gjermaninë dhe Europën Lindore që janë më të prekura.

Por pak analistë presin një recesion të plotë. Kjo është për shkak se disa ekonomi po përballen me krizën energjetike nga një pozicion më i fuqishëm dhe jo i dobët. Shumë firma shërbimesh po korrin ende fitime nga rihapja për shkak të përfundimit të bllokimeve të Omicron. Vendet jugore po përfitojnë më shumë, duke pasur parasysh varësinë e tyre nga turizmi. Në Spanjë, mbërritjet e veriorëve që duan motin e nxehtë pothuajse arritën nivelet para pandemisë në prill.

Në të gjithë bllokun kishte tre vende të lira pune për çdo 100 vende pune në tremujorin e parë të 2022, një nivel i lartë për standardet historike. Më shumë se një në katër biznese në Europë thonë se mungesa e stafit po i pengon ata të prodhojnë më shumë.

Shumë qeveri po aplikojnë programe të konsiderueshme shpenzimesh për të mbrojtur familjet nga çmimet e larta të energjisë. Gjermania, Franca dhe Italia dhe vende të tjera po shpenzojnë 1 deri në 2% të PBB-së.

Edhe nëse zona e euros do të kursehet nga një recesion, atëherë kriza për shkak të energjisë do të pengojë rritjen.

Banka Qendrore Europiane po përballet me një situatë të vështirë: me çdo rritje të inflacionit për shkak të çmimeve të ushqimeve dhe energjisë, ekonomia europiane po dobësohet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.