BSH rrit më tej normat e interesit! Sejko: Presioni i rritjes së çmimeve, më i lartë sesa vlerësimet e mëparshme

Këshilli Mbikëqyrës i Bankës së Shqipërisë ka vendosur të rrisë sërish normat e interesit, si përgjigje ndaj rritjes së çmimeve. Referuar vendimit, Këshilli Mbikëqyrës vendosi:

• të rrisë me 0. 5 pikë përqindjeje normën bazë të interesit, nga niveli 1.25% në nivelin 1.75%;
• të rrisë me 0.5 pikë përqindjeje normën e interesit të kredisë njëditore, nga niveli 2.25% në nivelin 2.75%;
• të rrisë me 0.5 pikë përqindjeje normën e interesit të depozitës njëditore, nga niveli 0.25% në nivelin 0.75%.

Në fjalën e mbajtur për mediat ku njoftoi vendimet, Guvernatori Sejko tha se informacioni i ri i marrë në analizë sugjeron se presionet inflacioniste janë më të gjera dhe më të forta se vlerësimet e mëparshme.

Inflacioni shënoi rritje progresive gjatë kësaj periudhe, duke kulmuar në nivelin 7.4% në muajin qershor. Nga ana tjetër, edhe ambienti i jashtëm vazhdon të mbetet sfidues, sidomos konflikti ushtarak në Ukrainë. Megjithatë, sipas Guvernatorit Sejko, ekonomia shqiptare ka pasur një ecuri relativisht solide në gjysmën e parë të vitit. Vëllimi i aktivitetit ekonomik u rrit me 6% në tremujorin e parë të vitit dhe treguesit indirektë sugjerojnë rritje të mëtejshme në tremujorin e dytë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.