Bursa shqiptare, në “lupë” kompanitë që do listohen – Do bëjnë transparente fondet, bilancet, fitimet, humbjet, kapitalin dhe informacionin e privilegjuar

Ndërsa Qeveria ka paralajmëruar listimin e dy kompamive publike në Bursën Shqiptare, duke e bërë këtë të fundit funksionale, Autoriteti I Mbikqyrjes Financiare (AMF) ka hartuar rregulloren që përcakton kërkesat për dhënien e informacionit periodik dhe të vazhdueshëm nga shoqëritë e listuara, titujt e të cilave janë pranuar për tregtim në një treg të rregulluar në Republikën e Shqipërisë.

Rregullorja përcakton mënyrën dhe formën e dhënies së informacionit nga shoqëritë e listuara, për të siguruar transparencën e duhur, përmes informacionit të rregulluar; afatet për publikimin e informacionit, dhe formën e përmbajtjen e raporteve vjetore të shoqërive të listuara. Emetuesit e aksioneve do të kenë detyrimin të bëjnë sa më shpejt publik informacionin e privilegjuar, i parashikuar nga ligji shqiptar për të shmangur abuzimet në treg.

Ndërkaq, Personat e ngarkuar me përgjegjësi drejtuese, si dhe personat e lidhur ngushtë me ta njoftojnë emetuesin dhe Autoritetin në raport me emetuesit, për çdo transaksion të kryer në llogarinë e vet që përfshin aksionet ose instrumentet e borxhit të emetuesit ose derivativë apo instrumente të tjera financiare të lidhura me to.

Sa i përket informacionit që subjektet do jenë të detyruara të bëjnë publik, përfshin  Raportet financiare vjetore, në mënyrë të vazhdueshme, Informacione që kanë ndikim mbi çmimet, informacione rreth pjesëmarrjeve të rëndësishme në kapital, informacione për mbajtësit e titujve, si dhe Informacioni i përcaktuar nga bursa, për të mbrojtur investitorin dhe për funksionimin efektiv të tregut, që bëhet publik kur kërkohet nga bursa, në përputhje me legjislacionin në fuqi.

Në rastet kur lindin dyshime për vërtetësinë e të dhënave, Autoriteti, në çdo kohë, nëse vlerëson nevojën e kryerjes së një riauditimi të pasqyrave financiare, nxjerr urdhër për riauditim. Nëse nga riauditimi i pasqyrave financiare konstatohen pasaktësi apo gabime, Autoriteti i Mbikqyrjes Financiare, mund të urdhërojë shoqërinë e listuar të publikojë gabimin dhe korrigjimin e tij.

Gjithësesi, duket se subjektet do të kenë të drejtën të mbajnë informacione të rezervuara. “Autoriteti në rast se vlerëson se publikimi mund të dëmtojë interesat e shoqërisë së listuar, urdhëron korrigjimin, por nuk nxjerr urdhër për publikim”, thekson rregullorja.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.